En vista de Rachel: Djudios en Amazonia: un kapitolo deskonosido de la istoria Sefaradi

En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.

Djudios en Amazonia: un kapitolo deskonosido de la istoria Sefaradi

Era dainda el presipio del siglo 19, kuando topamos ijikos djudios de Tanger i Tetuan, lo mas entre 13 i 16 anyos,  en las tierras salvajes de Amazonia.

La primera sinagoga se inoguro en Belem, en la boka del Rio Amazon, en 1824, 14 anyos despues de la yegada de los primeros sefaradis a esta rejion del norte de Brasil.  En 1848 se inoguro aki el primer semeteryo djudio de Brazil.  Antes de la Primera Gerra Mundial, la komunidad sefaradi de Belem era de 800 personas, kon organizasiones de bienfezensia i un klub sosial.

La primera kehila de Belem es la primera en el endependiente estado de Brazil, porke entonses no egzistia mas la de Resife, ke era fondada de sefaradim en 1636, I fue abandonada en 1654, kuando la sivdad paso de los Olandezos demuevo a mano de Portugal, I los djudios se fuyeron.  Algunos de eyos se fueron atras a Olanda, ma 24 de eyos vinieron a New Amsterdam, agora New York, ande fondaron la primera komunidad djudia del Norte Amerika, Shearith Israel, ke dainda egziste.  En Recife no uvo sinagoga aktiva asta ke se fondo la komunidad de meuvos emigrantes ashkenazis en 1918.

Istoria prezentada a Ladinokomunita en Rio

Ladinokomunita izo su enkontro de 2011 en Rio de Janeiro (11-18 Novembre) kon un program yeno, aranjado de muestra amiga Stella Garber, ke inkluyo una vijita al Museu Judaico de la sivda.   El presidente del museo, Max Nahmias, mos avlo de la istoria de los jdudios de Amazonia, i mos amostro un filmo yamado Eretz Amazonia sovre este tema.  El sinyor Nahmias es el mezmo desendiente de akeos ke se aresentaron en Amazonia, i su papu (nono) fue el mayor (alcalde) de la sivdad de Itacoacuara, a 180 kilometros de Manaus.

De Maroko a Amazonia, deke?

En emigrasion ay siempre faktores ke arondjan i faktores ke travan.  La situasion negra ekonomika i sosiala en Maroko los arondjava, i la oportunidad de ganar paras i la prometa de libertad en Brazil los travava.  Akel tiempo, el mas importante faktor atirante de Brazil era la valor grande del kauchuk (caucho) en la endustria moderna.  Los mansevikos djudios ivan en barkos en el rio Amazon, merkavan kauchuk i kuero de los indigenos en pagandoles kon produktos fabrikados ke les mandavan sus ermanos, primos, o parientes de Maroko o  de Evropa.

Desvelopamiento de komunidades

En primero, el viaje del Maroko a Brazil durava unos tres mezes.  Despues kon las barkas al vapor, esto duro solo tres semanas, lo ke ayudo tambien a enkorajar la emigrasion.  En Amazonia los djudios marokanos se arresentaron no solo en Belem (portugez por Betlehem), ma tambien en sitios mas isolados en Amazonia komo  Santarem i Manaus (en Brazil) i Iquitos (en Peru) i otros lugares mas chikos tambien.  La vida no era fasil; avia moshkitos, animales salvajes, malatiyas tropikales, i otros perikolos ke matavan a munchos de eyos.  Ma los ke sovrebivian ganavan tantas paras ke munchos pudieron aboltar a Maroko para tomar novia i traerlas aki.  Viendo la rikeza de los emigrantes a Brazil, munchos mas dujudios marokanos empesaron a emigrar tambien.  En 1890 uvo una ola grande mas djudios de Maroko, finansiada de los ke ya estavan establesidos en el Amazon.  En Cameta, un posto de komerso, la metad de la povlasion de 14000 abitantes eran sefaradim. La lengua les venia fasil porke ya savian espanyol i/o Haketia.

Eran relijiozos i azian lo todo para observar las fiestas i tradisiones djudias, asta kopyar la Sefer-tora i livros de orasion a mano. Algunos se kazaron kon indios, o kon mujeres blankas katolikas, ma a eyas tambien les ensenyaron el djudaismo.  Aun kon esto munchos desendientes de eyos se integraron en la komunidad jeneral, por esto es ke una investigasion genetika resiente de la Universidad de Minas Gerais topo ke el 16% de la povlasion del estado de Amazon tiene ansestros djudios, la mas alta proporsion en Brazil entero.  En el estado de Pernambuco, ande se topa Recife, esta proporsion es solo 2%.

En 1910 kayo el presio del kauchuk kon la produksion en Asia, i la gran parte de los djudios de Amazonia se fueron a mas grandes sivdades en la Amerika latina.  En Cameta la sinogaga ke se destruyo kon la inundasion del rio Tocantins no fue remplasada.    En munchos lugares, se topan oy solo los semeterios djudios.  Ma asegun los datos ke topi en Wikipedia, en Manaus oy ay 627 Judios i en Belem 900.  De Peru, munchos desendientes de los djudios de Amazonia izieron aliya a Israel.

El Rabino Santo de los Katolikos 

En 1908 el rabino Shalom Muyal Emanuel vino de Maroko para ayudar a los djudios izolados en Amazonia mantener sus djudaismo.  Despues de 2 anyos de estar en Manaus, el kayo viktima de una malatiya tropikal, murio, I fue enterrado en el semetrio jeneral, porke ayi no avia dainda semeterio djudio.   Lo kuriozo es ke despues de su muerte, los katolikos empesaron a kreyer ke este rabino era un santo ke azia milagros, I empesaron a azer orasiones I rogar por milagros en su tomba.   Esta tomba se topa dainda aya porke los katolikos no permetieron ke sus Santo Rabino sea transferado a semeterio djudio.

Para saver mas:

Podesh ver pedasos del filmo Eretz Amazonia (en portugez) en:

http://cinematecaparaense.wordpress.com/2011/05/05/eretz-amazonia-de-alan-rodrigues-2004/

El livro orijinal en portugez es Eretz Amazonia: Os judeus na Amazonia, eskrito de Samuel Benchimol.

El Internet tiene munchos buenos artikolos en Portuges.  Abasta solo meter “judeus-amazonia” en el bushkador.

I para el ke puede meldar inglez, rekomendo el eskrito maraviozo Kipur on the Amazon de Susan Gilson Millor en el livro “Sephardi and Middle Eastern Jewries”, editado de Harvey E. Goldberg (1996), ke kontiene munchos mas artikolos de entereso sefaradi.

Antes de dar fin a mi artikolo, ize una bushkedad en espanyol, i ke sorpreza!  El primer artikolo ke salyo fue el de eSefarad, kon fotos tambien, ke se topa en: Amazônia, terra prometida

Rachel Amado-Bortnick