eSefarad Noticias del Mundo Sefaradi
Ver todos los artículos de esta sección >>
Kero kontarvos kozas ke veygo i siento, kozas ke me agradan i penso ke vos van agradar, i tambien kozas ke me embarasan. Siempre me parese ke tengo mas muncho tiempo de lo ke tengo! Empesi a eskrivir el otro dia, kedi kon la konferensia via ZOOM sovre poezia en Ladino al sujeto de la Shoa, i mezmo esto no lo eskapi. Keria adjustar ke la profesora Monique Balbuena avlo tambien de Yehuda Poliker (de Israel) ke izo el disko kon la boz de su papa (de Salonik) ke sovrebivio Auschwitz. Fue muy enteresante para mi, porke yo tengo este maraviozo disko, ke me avia regalado mi amiga Ester Chotiner de Israel. El disko (CD) se yama “Jacko and Yehuda Poliker” i inkluye enrejistramientos de la boz de Jacko (padre de Yehuda) kantando kantes en ladino de Salonik de antes de la gerra. Una maraviya. Moshe Gormez me izo saver ke el kante «Limonero» del disko esta en Youtube:
Kreygo ke vos va agradar.
Meldi mas sovre Yehuda Poliker, i entre otros topi ke un filmo en 1988 yamado “Because of that War” (Achakes de akeya gerra – B’Glal Hamilhamah Hahi en ebreo) sovre la jenerasion de sovrebivientes i la ”segunda jenerasion”, los ijos de los sovrebivientes ke nasieron en Israel.
Agora pasaremos a otro sujeto:
Me embarasa muncho kuando veygo ke personas ke no son “avlantes nativos” de djudyo-espanyol i no konosen la lengua muy bueno azen yerros de kuando trezladan lo ke dizimos o eskrivimos, inkluyendo algunos akademikos. Tengo lista de egzemplos. Sin dar nombres, vos dare unos aki:
Empesaremos kon el verbo “embarasar”, ke en los videos ke vimos de VLACH ke mos embiyo Miguel, algunas vezes esta trezladadao komo “embarrass” en inglez, ke NO es djusto! En muestra lingua tiene dos sentidos en inglez, ma en el sentido ke uzo la sinyora, devia ser “upset” o “disturb.”
Sitando una fraza ke eskrivi yo sovre muestra lengua, ande dishe (sovre muestra lingua) “no la desharemos murir”, ke es “Let’s not let it die” en inglez, ma la persona lo trezlado komo “we shall not let it die.” Ma no es esto lo ke dishe yo! Aunke ya se ke esta forma se puede uzar para el futuro, ma en jeneral uzamos el augzilaryo “ir” kon el verbo. Ansi ke “we shall not let it die” en muestra lingua iva ser “no la vamos a deshar murir.”
Oy sinti (en un deskorso) el biervo “oya” i “beraha” trezladados yerrados.
Vo estar muy kontente si, kon este mesaj, puedo enkorajar a los ke traduizen del ladino ke mos demanden a mozotros aki en LK lo ke no entienden, para asegurarsen ke sus traduksiones esten djustas.
—————-
Rachel Amado Bortnick – Dallas
Fuente: Ladinokomunita
