En vista de Rachel: A la okazion de Purim: notas del “Tio Yekutiel”

En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.

Ver todos los artículos de esta sección >>

A la okazion de Purim: notas del “Tio Yekutiel”

Vos akodrash de las limpiezas ke se azia en kaza para aprontar para Pesah? Komo se vaziavan todos los kashones I los almarios, se shavonava I se alimpiava todo, I se enkalava las paredes? No es por esto ke vos vo eskrivir, ma me akodri porke a kavza de las reparasiones ke estamos aziendo en mi kaza en estos dias, ke se van a boyadear (pintar) las paredes tambien, tuve ke vaziar las etajeras de livros I kashones de archivos ke tengo guadrado desde anyos I panyos! Lo esto tomando komo ke si fuera limpiezas de Pesah!

Siguro ke no es posivle echar papeles i fotos sin mirarlos enprimero i kedar meldando tanta koza enteresante ke guadri. Entre estos estavan unos maraviozos eskritos de Yusuf Altintash ke korti de la oja en djudioespanyol del semanal Shalom de Estambol. Estos eran parte de una seria entitulada “La Myel I la Fyel de el Tio Yekutiel,” pedasos umoristikos, I en mezmo tiempo instruktivos I filozofikos, ke apresieron en los anyos 1996-1998, en forma de letras del “Tio Yakutiel” (ke ya esta en el “otro mundo”) a su suvrino Yusef/Yusuf. Yusuf eskrive aki kon munchos biervos I ekspresiones del turko i del ebreo, asigun se uzava a avlar. (Aktualmente Yusuf Altintash es el sekretario sivil i konsejero del Granrabino de Turkia.)

A la okazion de la fiesta de Purim, desidi de kopyar pedasos de la letra del “Tio Yakutiel” ke aparesio en Shalom el 19 Marso 1997 (10 Veadar 5757) entitulada “Purim Purim Lanu.” Me agrada komo me aze akodrar de todas las ekspresiones ke se uzava livremente en muestra lingua avlada. (En kopyando troki solo las letras turkas a sus ekivalentes en la ortografia standardizada de Aki Yerushalayim. Tambien meti una * en los biervos ke vo eksplikar en notas de pie.) Notar de kuantas maneras se refiere a El Dio en esta seleksion, i kuantas maneras de bendisiones I ogurios buenos yeno de kerensia.

A’l Onoravle Sinyor
Selebre Gazetero
Yusef mi Sovrino

Rogo del Todo Potente, ke mi letra prezente, te tope alegre i kontente.
Bendicho el Shem Yitbarah* ke ya vos ayego i este anyo al fiestar la fiesta de Purim en pas I alegria kon todos djustos, ke pujados seash, i nunka vos amenguesh.
Parati mintiras, parami verdad, dainda lo tengo en los oidos el Mi Kamoha ke kantavamos en las Tefilot de Purim aya en el Kal de Yenimale, un pPasuk kada Yahid, I ke kada uno de mozotros lo kantavamos uno mas sunturli* del otro, ast ake ya se arivava a un punto ke los ombres se metiyan a yerishear*ken lo va kantar mas mijor, I las mujeres de la Azara se alavavan I se glorifikavan kon sus maridos I ermanos diremos, I esto era de kontarse en kaza la semana entera mientres ke se komiyan las dulsuryas a parladar* I se bevia el vino puro de Nahman el meyanadji* …
…
El meldarse la Megilla era otra seremonia asi el Dyo Baruhu* te afirme todos tus dezeos.
Kuando ya vino la sira*, se teniya de kitarse la Megilla de su mafaza* de plata ke briyava i senteava komo las estreyas del sielo, se teniya de dezatar el chikuriko* de seda pura, se teniya de despolver el kuero por la parte puntuda kon grande kavod* I se teniya de empesar kon Vayii Bime Ahashverosh, komo lo ke se estava meldando un teksto sakro I santo de la ley.
La Megilla se teniya de meldarse por el Hazan kon su Taamimes* I salvo los unos kuantos ke teniyamos muestras Megillas i las yevavamos al Kal, los Yahidim* lo meldavan del livro. Koza kuryoza ke en la Megilla entera no pasa ni por una ves el nombre de El Todo Poderozo.
…
Las takatukas de las kreaturas I los chapteares* pye al patin de las mujeres ke estavan en la azara ke se sarsava* el Kal entero kon esto, todo el tiempo ke pasava el nombre de Aman Arasha mientres ke se meldava la Megilla …
…
Kuando ya se eskapo de meldarse, era de enbolver la Megilla, de fronyarla I de meterla a la mafaza kon grande kavod, I a la salida del Kal suetar d’aparte a parte Purim Alegre sin olvider de adjustar el Purim Purim Lanu Pesah En La Mano. Enverdad ke, fin ke serras I avres los ojos ya empesan los aparejos de Pesah kon bueno.
…
Purim alegre I para kada anyo mijorado Yusef.
Dales saludes* a los ke demandan pormi*.
El Dyo ke te guadre d’el dushmanlik* de akeyos ke te se amostran komo amigos Yusef, kon los de tu inimigos ya puedes salir abash* tu.

 El Tio Yekutiel

___________________________________________________________________________________

Shem Yitbarah = (ebr.)Nombre Bendicho
sunturli = (ladino+turko) kon sentimiento
Yerishear = (tur. Yarishmak+lad.) konkurrir
parladar = (tur. Patlamak + lad.) eksplotar
meyanadji = (tur. Meyhaneci) tabernero
Baruhu= (ebr.) Bendicho El
sira = (tur.) torno
mafaza = (tur. Muhafaza) proteksion (la kasha ke proteja el rolo de la Megila.)
chikuriko =(tur. çukur + lad.) el chiko kordon
kavod = (ebr.) onor
Taamimes = (ebr.) savores
Yahidim = (ebr.) ombres djudios
chapteares = (tur. çarpmak + lad.) dadas forsudas
sarsava =(tur. sarsmak + lad.) se meneava, tremblava
saludes = saludos (en dialekto estambuli)
pormi = por mi (en la eskritura rashi del ladino se uzava a adjuntar dos biervos kurtos.)
dushmanlik = (tur. düshmanlik) inimistad
salir abash = (lad. + tur.) poder defenderse (traduksion del turko basha çikmak.)

Rachel Amado-Bortnick
Dallas – Texas
Fondadora de Ladinokomunita