eSefarad Noticias del Mundo Sefaradi
En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.
Ver todos los artículos de esta sección >>
El Primer Teksto de Memorias en Ladino en un livro ekstraordinario:
A Jewish Voice from Ottoman Salonica: The Ladino Memoir of Sa’adi Besalel a-Levi.
(Redaksion i introduksion de Aron Rodrigue i Sarah Abrevaya Stein; traduksion, transkripsion i glossario de Isaac Jerusalmi. Stanford University Press, 2012.)
El mez pasado eskrivi en eSefarad sovre el livro An Ode to Salonika: The Ladino Verses of Bouena Sarfatty diziendo ke fue “plazer i alegria …de tener oganyo un otro maraviyozo livro …de memorias eskritas en ladino sovre Salonik.” Dishe “un otro” porke agora un anyo se publiko A Jewish Voice from Ottoman Salonica: The Ladino Memoir of Sa’adi Besalel a-Levi – un livro maraviyozo sovre el primer teksto ke konosemos de memorias en Ladino. Komo se ve del titolo, i estas son memorias sovre Salonik, ma de una epoka mas vieja, dainda del tiempo otomano, I fueron eskritas de mano en la eskrituria kursiva soletreo por el jurnalista i impresor Sa’adi Besalel Alevi.
El sutitolo del livro sitado ariva entre parentesis en mi traduksion al ladino, apuntan a las dos partes prinsipales del kontenido del livro. La primera es la Introduksion de los redaktores Aron Rodrigue i Sarah Abrevaya Stein, ke mos da una ancha i profunda analisis del tema prinsipal, ke es la sigunda parte: la “boz djudia de Salonika otomana, las memorias en ladino de Sa’adi Besalel a-Levy. ” Aki topamos el teksto en ladino transkrito en letras latinas (del manuskrito en soletreo) por el bien konosido haham i profesor Isaac Jerusalmi, el kual adjusta tambien un glosario de los terminos ebreos, turkos, I otros. Lo ke no indika el titolo es ke el manuskrito orijinal en soletreo se puede ver en Internet ande las ojas tienen los mezmos numeros indikados en el livro.
Algunas partes de las memorias de Sa’adi fueron publikados de antes por su ijo Sam Levy, en su jurnales Les Cahiers Sefardis i Le Judaisme Sefardi (1933) ke publikava en Paris, i de antes, en Salonik tambien. Ma asta agora nunka tenia salido a luz el teksto kompleto, o el mas kompleto ke egziste, komo lo vemos en este muevo livro, un kapolavoro de kolaborasion de tres sefaradis en la Amerika!
Sa’adi Besalel a-Levy (1820-1903) era jurnalisto bien konosido en Salonik, fondador, redaktor i imprimidor del jurnal La Epoka (ke despues paso a su ijo Sam) ansi ke kompozitor de muzika i kantador bien amado por su ermoza boz ke animava las fiestas en la komunidad. Su imprimeria kito a luz todo jenero de livros en ladino, ebreo, i fransez – entre eyos todos los livros del famozo Rav Hayim Palachi de Izmir.
Ma en mezmo tiempo Sa’adi era un gran kritiko de los rabinos fanatikos i atrazados ke dirijiyan la komunidad djudia kon severidad, dezonestia i indjustisia, i de los maestros inyorantes de las eskolas ke inchiyan las kavesas de sus elevos kon vaziyedades. En su lucha en favor de la edukasion moderna para las kriyaturas djudias, el kolaboro kon su amigo Moise Allatini para estableser la primera eskola de la Alliance Israelite Universelle en Salonik (1873.) Los rabinos de sus parte le kavzavan bastante angustia, asta ke, en 1874, akuzaron a Hayim, ijo de Sa’adi, de desakrar el Shabat, i kuando Sa’adi eskrivio en defensia de su ijo, les metieron el herem (ekskomunikasion) a el i a su ijo. La profunda pena i umiliasion de este absurdo, anakronista, i kruel kastigo Sa’adi eksprimo en las memorias ke eskrivio despues de munchos anyos – entre 1881 i 90 – i mezmo adjusto algunas notas en 1892, kuando ya estava kuaje siego.
Las memorias de Saadi son probablemente las primeras eskritas en ladino. (Una nota: “Ladino” es el termino uzado por djudeoespanyol en el livro A Jewish Voice from Ottoman Salonica, i aki tambien.) Ma a la kontra del jenero de memoirs konosido, aki no ay ni nostaljia, ni rekuerdos de su famiya, ni introspeksion personal. Este teksto, eskrito en kapitolos, mos transmete de su punto de vista evenimientos, uzos i tradisiones en Salonik durante su vida, i keshas de las superstisiones i inyoransa ke kavzavan tanto espanto, malatias, i muertes. Mos konta de las desgrasias komo fuegos, terretemblos, gerras i revoltos ke aharvaron la komunidad. Naturalmente, uno de los mas largos kapitolos en el livro es el no 25 (entitulado “De aki empesa mi estorya partikular”) ke relata las sirkunstansias del herem ke fue pronunsado sovre el i su ijo, i la manera ke se fuyo de sus persegidores, komo en un filmo de aventura. Los abuzos de los hahamim i gevirim (dirijadores komunal), a vezes kon la kolaborasion de los ofisiales otomanos, es un tema ke penetra kuaje todo lo ke konta. Ma tambien en esto todo vemos la vida en una sosiedad ande djudios, gregos, turkos, i evropeos bivian en libertad, i kon kontaktos serkanos aunke moravan aparte en sus kartieres partikular. Era una epoka tambien de trokamientos sosiales, politikos i ekonomikos.
Para mi, un aspekto muy valutozo del livro es el teksto en ladino, ke es la verdadera “boz” de un djudio otomano salonikli del sieklo 19. La valor es dainda mas grande porke el muy erudito Isaac Jerushalmi mos aklara todas las ekspresiones en ebreo, mos da las sitasiones de las frazas biblikas, i mos aregala un riko glosaryo ke merese ser guadrado i uzado komo un diksionaryo suplementario de ladino-inglez. La transliterasion reflekta los biervos egzaktos eskritos por Sa’adi en sus prononsasion otentika.
La Introduksion de los editores es komo un livro aparte de enformasiones enteresantes. Aki meldamos los aspektos de la sosiedad salonikli otomana prezentes en el teksto de Sa’adi Besalel Halevi, i las transformasiones i trokamientos ke avian empesado. Meldamos tambien la estoria de komo el profesor Rodrigue topo el manuskrito en israel, I komo el i la profesra Stein toparon a los desendientes de Sa’adi.
El livro A Jewish Voice from Ottoman Salonica: The Ladino Memoir of Sa’adi Besalel a-Levi es una kolaborasion maraviyoza de tres sefaradim para azermos sentir “la boz djudia de Salonika Otomana” de Sa’adi Halevi.
