eSefarad Noticias del Mundo Sefaradi
Programa espesial selevrando el Día de la Hispanidad, kon informasión sovre aktividades en Madrid i konsiertos de artistas nasionales i internasionales. La Hispanidad selevra el bugueto de distintas kulturas ispanas, kolores kon ke se engalana la sivdad de Madrid desde el 3 de Octubre, indemás de su tradisional desfile militar por el 12 de Octubre, data de importansia kultural i sosial.
Ofresemos informasiones de los Konsiertos i unotras aktividades en siendo Argentina esta anyada el país musafir, kon sus artistas komo «Babasónicos», «Miranda!» o «La Orquesta del Plata» destacada orkesta tanguera ke ofreserá un ermozo espektákulo. Munchas aktividades para toda la famyia sin koste de moneda para selevrar la Hipanidad en Madrid en sus distintas plasas más afamadas komo la Plaza Mayor. Los artistas ofresen Konsiertos tambyén en Sol, Plaza Colón i Madrid Río.
Indemás selevramos estos días la Festividad de Sukot, Fiesta de las Kavanyas en el Kalendario Evreo. «Avó el Dió a Moshé diziendo: Avla a a los ijos de Israel i ke el día 15 del séptimo mes selevren la fiesta de las kavanyas, en eyias moraréis siete días para ke sepan vuestros deshendientes ke en kavanyas moraron los ijos de Israel kuando los liveré de la tiera de Egipto, Yo So Vuestro Dió» (Torá, Levítiko cap 23, v 33, 34).Informamos a los oyentes sovre el orijin de esta sagrada Festividad de la Torá ke prinsipió esta anyada el 6 por la nochada i da fin el día 13 de Octubre en la Festividad de Simjá Torá, onde fraguamos una kavanya ke reprezenta la proteksión del Dió, la frajilidad de la vida i rekodra el kamino del puevlo evreo traverso el desierto por odren del Dió durante 40 anyos en direksión a la tiera prometida, Israel. Mos akompanya en este viashe sagrado el kante bíbliko «Moshé salió de Mitzraim» interpretado por Viviana Rajel Barnatán kontinuamos kon un kante a kapela de los djudiós sefardim de Tetuán «El vapor por el awa» interpretado por Henriette Hazen (Tetuán). Días festivos onde la selevrasión se topa en primo lugar. Kurunamos el programa kon el kante en lingua sefardí tradisional «Tres ermanikas eran» ke interpretan Janet & Jak Esim. En Emisión Sefarad la tradisión es festiva, la aktualitá i la vida sefardí siempre en komunitá.
________________________________________________
Muevos orarios emisión: Domingos 09’30, Lunes 12’05, Lunes 22 hs. (Onda corta), España
La «Emisión Sefarad» es un programa kultural de radio, en lingua sefardí o djudeo-espanyol, que se siente kada lunes enverso Oriente Medio i Mediterráneo i los martes enverso América Norte i Sur. Sefarad es uno de los nomvres de Espanya, i el sefardí es una lingua de baza medieval a la ke se adjuntan palavras de los dialektos i linguas de las sivdades onde los sefaradim moravan. Rajel Barnatán, apareja i prezenta las emisiones i sus kontenido por entero: entrevistas, presonajes, folklor i múzika de ancha diversidad, aktividades, tradisiones, literaturas i una lingüístika atada a la kultura ke tyene sus raízes en Espanya. Ansí «Emisión Sefarad» guadra el trezoro poétiko de los S X al XII en uno de los grandes patrimonios kulturales entregados a la umanidad. Ansiemzmo la kreasión kontemporánea arrebive en muestros días i atira el intereso de oyentes de diversos lugares i paízes.
