eSefarad Noticias del Mundo Sefaradi
La importansia de la edukasión i su reflekto en la tradisión sefardí: edukar, ensenyar i ambezar. Prinsipiamos el programa kon la aktualitá sefardí kultural en Sefarad (España)prezentando al muevo Director de Centro Sefarad-Israel en primisia. Entrevista a Andy Faur, sosiólogo, Ravino laiko i edukador kon orijines sefardim ke desde Israel, mos aserka una visión para la vida, edukando i konosiendo la esensia de las ensenyanzas en el djudaísmo. Konversamos sovre puntus de su konferensia en serka «Situación de la tradición judía sefardí y su impakto en el turismo» i sovre la importansia de ensenyar la étika a los mansevikos, más ayá de las relijiones, la valor de konservar la lingua i tradisiones sefardim, las ensenyanzas de la Torá, el desvelopamiento de la alma para ser mijores, el Pirke Abot, (Étika djudía), la edukasión en los mansevos, el ambezar traverso internet i munchos más temas de la aktualitá de la kultura sefardí. Kurunamos el programa kon el ermozo kante tradisional «Una noche al lunar» en la interpretasión de la kantadera Marlène Samoun. La tradisión i la lingua sefardí se deven kontinuar dando a konoser en Sefarad i en el mundo por entero: muestro lavoro.
________________________________________________
DOMINGOS A LAS 22.30 HORAS, MARTES A LAS 18.30 HORAS UTC.
La «Emisión Sefarad» es un programa kultural de radio, en lingua sefardí o djudeo-espanyol, que se siente kada lunes enverso Oriente Medio i Mediterráneo i los martes enverso América Norte i Sur. Sefarad es uno de los nomvres de Espanya, i el sefardí es una lingua de baza medieval a la ke se adjuntan palavras de los dialektos i linguas de las sivdades onde los sefaradim moravan. Rajel Barnatán, apareja i prezenta las emisiones i sus kontenido por entero: entrevistas, presonajes, folklor i múzika de ancha diversidad, aktividades, tradisiones, literaturas i una lingüístika atada a la kultura ke tyene sus raízes en Espanya. Ansí «Emisión Sefarad» guadra el trezoro poétiko de los S X al XII en uno de los grandes patrimonios kulturales entregados a la umanidad. Ansiemzmo la kreasión kontemporánea arrebive en muestros días i atira el intereso de oyentes de diversos lugares i paízes.
