eSefarad Noticias del Mundo Sefaradi
Ofresemos un programa sovre Pesaj, la fiesta de la matzá, kuando Dió liveró al puevlo evreo de Egipto. Pesaj es una de las festividades de la Torá i una de las más importantes en el kalendario evreo. Esta anyada kayie el 1 de Abril ke se selevra el primer Seder de Pesaj, una kumida festiva onde se konta la Hagadá, la istoria de la liverasión de los djudiós por el Dió, traverso el patriarka Moshé Rabenu. En este programa te kontamos las palavras de la Torá (Viesho Testamento), manadero de la fiesta, damos eksplikasiones al orijín de la fiesta, el Seder i los simbols ke se aparejan en la Keará, plato de la mesa de Pesaj: apio, guevo duro, iervas amargas, jaroset i todo lo ke no deve mankar, indemás de la savurida kumida festiva i las dulsurias tradisionales. Todo lo ke deves saver sovre la mesa del Seder i su selevrasión, kon kantes i la istoria de las plagas i la liverasión. La matzá, pan ázimo es el sentro de la fiesta, simbol de la umiltá, onde por ocho días tomamos matzot. Kompartimos los kantes i komplas de Pesaj komo Pesaj a la manu kante ke mos adentra en Pesaj, dempués de la fiesta de Purim, el kante bíbliko Moshé salió de Mitzraim en la versión de Marlène Samoun, i unotro kante de la Hagadá El Cabretico en la interpretasión de Joaquín Díaz. Kurunamos el programa kon el afamado kante de la Hagadá para todas las chikas kriaturas Un kavritiko esta es unotra versión de la kantadera Flory Jagoda. Pesaj alegre para todos kon bindisiones.
________________________________________________
Muevos orarios emisión: Domingos 09’30, Lunes 12’05, Lunes 22 hs. (Onda corta), España
La «Emisión Sefarad» es un programa kultural de radio, en lingua sefardí o djudeo-espanyol, que se siente kada lunes enverso Oriente Medio i Mediterráneo i los martes enverso América Norte i Sur. Sefarad es uno de los nomvres de Espanya, i el sefardí es una lingua de baza medieval a la ke se adjuntan palavras de los dialektos i linguas de las sivdades onde los sefaradim moravan. Rajel Barnatán, apareja i prezenta las emisiones i sus kontenido por entero: entrevistas, presonajes, folklor i múzika de ancha diversidad, aktividades, tradisiones, literaturas i una lingüístika atada a la kultura ke tyene sus raízes en Espanya. Ansí «Emisión Sefarad» guadra el trezoro poétiko de los S X al XII en uno de los grandes patrimonios kulturales entregados a la umanidad. Ansiemzmo la kreasión kontemporánea arrebive en muestros días i atira el intereso de oyentes de diversos lugares i paízes.
