eSefarad Noticias del Mundo Sefaradi
Ke akontesió kon la rika Komunidad Djudía en Guadalajara, España? ¿Desde kuando se topavan los djudiós en esta sivdad de Castilla La Mancha? Investigamos la vida de los djudiós espanyoles en esta Djudería ke fue la primera en kontar kon una imprenta, te informamos kuales fueron los primos livros ke fueron impresos. La istoria de los Djudiós de Guadalajara es destakada dunke enfloresió kon un importante rolo ekonómiko, sus djudiós fueron afamados shientífikos, tanto en la agrikultura i la artesanía izieron kreser esta Djudería de Sefarad, ansí komo en la literatura. Indemás kompartimos valiosas dokumentasiones kon datos de los impuestos ke azían pagar a los djudiós de Guadalajara, ke se topavan en una muy buena pozisión ekonómika i komersial. Todo lo atado a esta Djudería te lo kontamos: Guadalajara kontava kon 8 Sinagogas i kon una importante Eskola Talmúdika. Destakamos los grandes presonajes de djudiós ke nasieron en Guadalajara i ke yevaron la sivdad a lo más alto en kultura i ekonomía. En la seleksión de múzikas i kantes tradisionales ofresemos el romance «Triste está el Rey David» interpretado por el Grupo Cinco siglos sobre la muerte del ijo del Rey David, Absalón, kontinuamos kon «La rosa enflorese» en la versión del Grupo A Ballare. Kurunamos el programa kon el kante tradisional sefardí «Adiyo Kerida» en la versión de Esther Ackermann.
Kompartimos la istoria deskonosida de la Djudería de Guadalajara onde soltanto keda oy la kaleja (Calle) de la Sinagoga.
.
________________________________________________
DOMINGOS A LAS 22.30 HORAS, MARTES A LAS 18.30 HORAS UTC.
La «Emisión Sefarad» es un programa kultural de radio, en lingua sefardí o djudeo-espanyol, que se siente kada lunes enverso Oriente Medio i Mediterráneo i los martes enverso América Norte i Sur. Sefarad es uno de los nomvres de Espanya, i el sefardí es una lingua de baza medieval a la ke se adjuntan palavras de los dialektos i linguas de las sivdades onde los sefaradim moravan. Rajel Barnatán, apareja i prezenta las emisiones i sus kontenido por entero: entrevistas, presonajes, folklor i múzika de ancha diversidad, aktividades, tradisiones, literaturas i una lingüístika atada a la kultura ke tyene sus raízes en Espanya. Ansí «Emisión Sefarad» guadra el trezoro poétiko de los S X al XII en uno de los grandes patrimonios kulturales entregados a la umanidad. Ansiemzmo la kreasión kontemporánea arrebive en muestros días i atira el intereso de oyentes de diversos lugares i paízes.
