eSefarad Noticias del Mundo Sefaradi
La Cumbre Erensya esta anyada se selevró en Sefarad, Madrid i Toledo del 9 al 11 de junio. Ofresemos informasión del Akto Inaugural en el Instituto Cervantes de Madrid de la VII Cumbre Erensya kon testimonios de las presonalitades i musafires. Prinsipiamos kon palavras de Luis García Montero, director del Instituto Cervantes ke avrió el Akto de prezentasión, palavras de Carmen Álvarez Rodríguez, subdirectora de Coherencia en la Acción de Fomento del Español, kontinuamos kon palavras de Jaime Moreno Bau, Director de Centro Sefarad-Israel aresiviendo a los musafires i al púvliko. Rebeca Gutiérrez Rivilla, Responsable de la Unidad del Hispanismo del Instituto Cervantes prezentó a Jorge Úbeda Gómez, Profesor de Filosofía de la Universidad Complutense de Madrid kon la konferensia «La biblioteca judeoespañola de Spinoza: una visión filosófica» ke avló de una kantika sefardí ke él konosía de chikitiko i ke kantava en famyia kon su ermanika sin saver su orijin, un dato interesante onde vemos komo los kantes sefardim pasaron su legado oral asta muestros días i se konservaron en famyias de antepasados djudiós. Ansimezmo se ofresió un Kolokio Primero «El judeoespañol en el Siglo XXI» onde pudimos sentir palavras en djudeo-espanyol de Shmuel Refael, secretario de la Academia Israelí del Ladino y director del Instituto Salti para el Ladino de la Universidad Bar Ilan ke ofresemos a los oyentes, onde tambyén partajó Paloma Díaz-Mas, Eskritora, Catedrática i Investigadora de la Lingua sefardí i Carmen Álvarez Nogales, directora del Museo Sefardí. Un Sigundo Kolokio se tituló «El Instituto Cervantes y el judeoespañol» kon distintos directores del Instituto Cervantes de diversos paízes: Iñaki Abad Leguina (Belgrado), Pilar Tena García (Atenas y Salónica), Francisco del Río Sánchez (Tel Aviv) i Abel Murcia Soriano (Bucarest). En Toledo se ofresieron distintas konferensias i vishita al Museo Sefardí. Kurunamos el programa kon el kante «Tus ojicos» en la versión de Joaquín Díaz..
.
________________________________________________
DOMINGOS A LAS 22.30 HORAS, MARTES A LAS 18.30 HORAS UTC.
La «Emisión Sefarad» es un programa kultural de radio, en lingua sefardí o djudeo-espanyol, que se siente kada lunes enverso Oriente Medio i Mediterráneo i los martes enverso América Norte i Sur. Sefarad es uno de los nomvres de Espanya, i el sefardí es una lingua de baza medieval a la ke se adjuntan palavras de los dialektos i linguas de las sivdades onde los sefaradim moravan. Rajel Barnatán, apareja i prezenta las emisiones i sus kontenido por entero: entrevistas, presonajes, folklor i múzika de ancha diversidad, aktividades, tradisiones, literaturas i una lingüístika atada a la kultura ke tyene sus raízes en Espanya. Ansí «Emisión Sefarad» guadra el trezoro poétiko de los S X al XII en uno de los grandes patrimonios kulturales entregados a la umanidad. Ansiemzmo la kreasión kontemporánea arrebive en muestros días i atira el intereso de oyentes de diversos lugares i paízes.
