eSefarad Noticias del Mundo Sefaradi
Por miles de anyos los humanos miraron al sielo las noches i se demandaron ke eran estas luzes.
En el Siglo 17 una invension, ‘el teleskop’, trusho el sielo mas serka. Les permetyo de ver otras planetas i estrelyas mijor ke antes i de esto nasyo la siensia de la astronomia. La teknolojia del teleskop avanzo mas i mas kon el tiempo ayudando a ver mas leshos. Oy se yevan objetos a otras planetas
i meten grandes teleskopes en el espasio para konoser mijor el universo.
EL TELESKOP es un instrumento ke arekoje luz i otras formas de radiasiones elektro-magnetikas para krear una imajen engrandesida i mas detalyada de todo lo ke egziste muy leshos.
EL TELESKOP EN EL ESPASIO representa la teknolojia de las roketas de los anyos 1950 ke krearon la posibilidad de enviar al espasio objetos ke se moven alrededor de la planeta, leshos de la gravidad de la tierra. Esto ayuda a ver mas klaro.
Tenemos rekodros de los pre-istorikos estudiando la luna i su siklo i los otros astros en el sielo. Las estrukturas komo el Stonehenge en Inglaterra, Las piramides en Egypto, el observatorio Kokino en Makedonia eran aliniadas kon el sol i la luna. Los Mayas izieron observasiones korrektas
del Venus. El Torre de Gainas en Mexiko parese tambien a un observatorio. Pero los ansianos veian kon sus ojos solamente.
Dinguno save kuando la teknolojia de los antojos fue deskuvierta. En el Siglo 13 en Europa metian antojos para engrandeser los objetos. Fue en el Siglo 17 ke toparon el teleskop. Un Hollandeso nasido Aleman
Hans Lippershey resibio el patento real i lo yamo «Verrekijker/Ver leshos». Este instrumento era util en la armada para ver el enemigo de leshos.
EL HUBBLE SPACE
Es Edwin Hubble el Amerikano ke dyo su nombre a este teleskop. No era el primero ni el ultimo en el espasio. En 1986 en el «Space Shuttle» el vehikulo se pedrio i este eksperimento fue retardado hasta 1990. Los Evropeos
tambien enviaron un teleskop yamado «Schmidt» kon otros para haser mapas de las posisiones de las estrelyas.
Se preparan por el » James Webb Space Telescope» en el anio 2014.
Fuente: Enviado por Shimon Geron a Ladinokomunita
