eSefarad Noticias del Mundo Sefaradi
Keridos amigos i amigas
En el Jewish News de la semana pazada ay un artikolo presentado por «Yvette Alt Miller» ke trata de la Istoria Judia en relasion a la Iglesia de «Notre Dame». Munchos símbolos Judios son presentados en las estatuas del techo i tambien se ve el antagonismo de los kristianos verso los djudios en una istoria ke kuvre 8 sieklos.
Saludes a todos
——————————————————————————-
EL NARRATIVO JUDIO EN «NOTRE DAME»
El mundo estava en choke al oyir ke la Iglezia de Notre Dame se estava kemando. Notre Dame en indo atras al siglo 12, se ve lo ke era la vida 8 siglos antes. La mayoría de la poblasion era analfabeta i munchos bivían en miseria. Al mirar a las estatuas en elkozas sierven komo edukasion ilustrando Istorias Bíblikas, Relijiones i pasando un messaje a los Kristianos de la Era Medieval en Paris. Parte grande del arte tiene ke azer kon los Judios. Ensima de la katedral se topan 2 estatuas santas de «Anne i Joachim» i se pensa ke eran los avuelos de Jesus. Komo eran Judios el artisto tuvo ke servirse de modeles Judios. En el tiempo los Judios eran apenas tolerados.
El Rey Philip II echo a los Judios afuera en 1182 i en poko tiempo se tornaron atras en sekreto biviendo en sivdades komo Paris i en las aldeas. Tenian restriksiones en sus aktividades en manera severa. El Papa Innocent II en 1215 les prohibió de exersar todas las profesiones eksepto el usuario i la venta de vestidos viejos. Ademas los Judios eran forsados a meter vestidos ridikulos para ke vean la diferensia entre el Judio i Kristiano. La istoria se ve en la iglesia desde 800 anyos mostrando los vestidos de Anne i Joachim en sus kazamiento. Tuvieron ke kopiar una Sinagoga Medieval. Serka se topava la Tora kon los livros i el NER TAMID ke es una lampa alumbrada siempre en las sinagogas. Se ve mismo el rulo de Tora en la BIMAH. El Rabino ke konduse el kazamiento esta anvelopado en TALIT.
En 1239 el Papa Gregory IX embio letras a los Lideres de la iglesia i a los Reyes de Ingletierra, Espanya i Portugal kon kargas en dozenas, kontra el Talmud. Komo konsekuensia todo el lavoro Judio fue destruido i mas en Paris. En Marso 1240 ofisiales de la iglesia entraron a las sinagogas a traves el pais en Shabat, kuando estavan yenas de djente i se yevaron kon eyos los livros sakorte para ser djuzgado. 4 rabinos se metieron a su defensa en medio de akuzasiones. Los rabinos perdieron i el Talmud fue kondenado a ser kemado. En 17 Junio 1242 trusheron 24 vagones del Talmud ke kontenían 10.000 livros i los kemaron. Rabbi «Meir de Rothenburg» konosido komo «MAHARAM» vido el fuego i disho «Mis lagrimas forman un rio indo asta Sinai i a las tombas de Moshe i Aaron. Es ke ay una otra Tora a remplasarla?» Las 2 estatuas en la fasade de Notre Dame kapturan el sentimiento de Kristianos i Judios del tiempo. A la derecha ay una mujer en derrota i tiene los ojos kuviertos por un serpiente i se topa bashando la kavesa. Las tablas de la Tora debasho sus brasos, estan arezvalando. Debasho sus pies esta una korona tornada en polvera. La yaman «SYNAGOGA» ke representa el Judaismo. A la siedra ay una mujer vestida buena i derecha kon la Kruz konosida komo «ECCLESIA» signifikando la Iglesia Katolika ke keria ke a los ke entravan ayi dizir ke el Judaismo era terminado i umillado. Eran alegorías importantes en la Dominacsón Kristiana i en la umillasión Judia al punto ke kuando las estatuas fueron destruidas en tiempo de la Revolusion Franseza, las rekrearon i remplasaron en 1800’s. Arriba se ve La Galleria de los 28 reyes en Judea i a Isabel. Esto fue remplasado tambien.
En 1306 el Rey Philip III en siendo korto de fondos se desidio de meter sus manos en los bienes de los Judios. No era koza mueva porke se ve de la fraze de Latin las palavras «SERVI CAME RAE REGIS» Signifikando mozos de la kamareta del rey». El rey puedia azer kon eyos todo lo ke keria. En 22 Julio 1306 en TISHA B’AV arrestaron a 100.000 Judios i les disheron ke eran kondenados al exilio. Kada uno puedia yevar solamente los vestidos ensima i 12 SOUS. En los mezes sigientes el Rey Philip II metio en AUCTION los bienes Judios. El orden de exilio ke fue reversido por su ijo el Rey Louis X se trusho atras en 1322. Tuvieron ke pasar unos siglos para ke los Judios se sientan seguros. Una vez ke el territorio de Fransia se engrandesio asta los lugares ande los Judios avian fuido, eyos establesieron komunidades muevas.
Trezladado por Shimon Geron.
Sydney, Australia
Nota: Al meldar las kozas ke se pasaron en Fransia i kisas en los anyos 1300’s realizo ke la Inkizision Espanyola puedia venir komo resultado de lo ke veian en otros paises.
Fuente: Ladinokomunita
