eSefarad Noticias del Mundo Sefaradi
Keridos amigos i amigas
En el JEWISH NEWS de esta semana «Rabbi Dr.Benjamin Elton» avla del Misterio de Haroset. una de las komidas favoritas en Noche de Pesah Haroset. Una meskla de kolor maron ke se mete en el plato del Seder. Simboliza el chemento ke utilizaron muestros ansestros para konstruir unas kazas se depot para el Paro. Se toma MAROR/Yervas Amargas para komemorar muestro esklavaje en Ejipto. Se mete MAROR kon HAROSET simbolizando la amargura. En mi famiya el haroset se azia kon mansanas i polvo de almendra siendo machugados metiendo tambien el vino de Kidush kon kanela. Kuando en la Tradision Sefaradita se aze kon frutas sekas i datas. Ay ke dizir ke haroset no es del todo amargo. A la kontra es dulse. Porke Maror es amargo, tambien el haroset simboliza el lavoro duro ke los israelites tuvieron.
Saludes a todos.
Porke es dulse? Rabi Akiva ensenyava ke mismo si los ombres no kerian tener kriaturas por razon de mas sufrimiento alargado, las mujeres eran determinadas a traer kriaturas al mundo. Yevavan a sus maridos a los mansanarios para asegurarsen ke tendrian mas kriaturas. En el Verso «Kantes de Kantes» ke se melda en Shabat, en medio i a al fin de Pesah, basho el arvole de mansanas, el ninyo se desperta i la madre le dize «te trushe al mundo». Despues se aze el haroset de mansanas en onor de las mujeres ke no avian renunsiado a este derecho.
En una parte del MIDRASH ke parese extranyo se dize ke el Paro kijo matar a los ijos Judios. La tierra se alevanto i los tomo arientro para ke sean protejados. Kuando paso el peligro salieron afuera de la tierra komo plantas freskas i vedres. Djusto komo las mansanas.
En las 2 interpretasiones se avla del sufrimiento i se rekonose ke a la fin uvo un renasimiento i ke venia la parte dulse. Deven aver tambien otras razones para ke sea dulse. Antes de todo esto representa una reushita i es la razon para ke sea dulse. Si eyos eran esklavos i sus lavoro era duro, el lavoro en si era reel i no puedia ser tomado de eyos. Konstruyeron a PITOM i RAMSES. pero despues de la intervension de Moshe toparon sus ingredientes kon los kualos izieron sus piedras. La demanda fue grande ke les trusho satisfaksion.
Aki se topa un paralel kon otras sosiedades ke se servian de los esklavos. Komo Gresia i Roma i Los Estados Unidos antes de la Gerra Sivil. Se konstruiya todo en la espalda del esklavo. Ken fue ke kreo el Colloseum en Roma? Eran los esklavos Judios. Tenemos ke kondenar a estas institusiones de esklavaje. pero tenemos tambien de rekonoser lo ke los esklavos kumplieron.
Ke haroset sea dulse es una legasia positiva sovre todo una legasia etika. El mesaje es «Amar al vizino i al ajeno. No oprimirlo i no azerle mal. Porke fuimos ajenos en Tierras de Ejipto. Es ke se puede tener empatia sin aver pasado por las mismas experiensas? Ejipto no fue el solo lugar de la istoria judia. Era esensial de tener estas experiensas antes de tener muestro pais, para pueder tratar al ajeno kon respekto i kompasion. Esto es un imperativo para todas las nasiones judia i otras. Komo uno trata al ajeno de afuera ke es non-konformisto, es la marka de su umanidad i karakter.
Trezladado por Shimon Geron, Sydney
