eSefarad Noticias del Mundo Sefaradi
Durante la gerra de Kipur en 1973 avian kombates duros entre Israel i la Siria en los Altos del Golan. Muchos askieres (soldados) Israelianos i Sirianos murieron i muchos fueron feridos.Tankes se kemaron i aviones kayeron abasho, avia una grande konfuzion. La situasion estava muy negra.
En la armada Israeliana avia un doctor savio i ajil ke se yamava Moris. Lavoro oras i oras sin deskansarse para salvar askieres.Un dia vido en un kampo un askier Israeliano estirado embasho, se aserko i vido ke el askier esta ferido gravamente en la kavesa i una mancha de sangre a la tierra. Moris entendio ke kale tomarlo presto al ospital.
Lo tomo enriva la espalda, i kamino ansi por oras, avlando kon él para ke no se durma, asta ke yegaron al punto de arekojimiento i ayudo medikal. En el kamino le konto ke se yamava Moris i ke es doktor i ke lo kiere salvar. Al ferido lo yevaron al ospital Ziv en Safed (Tsfat) i lo salvaron. El doktor ke estava dezmayado, repozo i se enrezio para kuntinuar a salvar askieres. Un dia Moris vijito el ospital a ver komo esta el ferido. Savia solo ke se yamava Marwan, ke era Druzo, i ke morava en Isfiya en el Monte Karmel. Moris tenia poko tiempo i no lo topo a Marwan, i se torno a su lavoro.
Marwan paso tiepos duros i operasiones i estuvo en el ospital serka de sesh mezes. En saliendo del ospital sano i rezio bushko a kien lo salvo, ma no lo topo. Savia ke se yamava Moris i ke es doktor.
Pasaron anyos, todo se troko, ama Moris kedo en el korason i en el penserio de Marwan.
Un dia le telefono a Marwan el amigo bueno ke tenia en la America i lo envito ke venga lavorar kon el. El amigo estava prosperando, teniendo reushita grande en sus echos.
Marwan partio para los Estados Unidos, ande su amigo lo ambezo el echo, i lo fizo direktor de un kazino.
Un dia Marwan se topo en el ofisio de kontrol, ande se ve lo ke pasa abasho en la sala de djugos. Ensupito vido al lado de la meza de roleta, un turisto ke tenia una facha konisida…
Salto presto i abasho korriendo a la sala. Los empiegados ke lo vieron korrer, empesaron i eyos a korrer detras de el kon pistoles prontos en sus manos. Marwan los areto. «No no. Esto es solo mi echo.»
Se aserko al turisto i le disho: «Pardon musyu, komo te yamas?» Yo me yamo Moris, respondio el ombre. Kualo keres?
Tu sos doctor? demando Marwan. Si, disho Moris kon supriza en su kara. Ven kon mi, disho Marwan, no tienes menester de djugar, ya ganates, i se abrasaron kon lagrimas de alegria.
Nissim Ashkenazi
Kiryat Motskin
Israel.
Fuente: Ladinokomunita
