eSefarad Noticias del Mundo Sefaradi
Karos akademisyenes, karo ministro Eli Bendahan, su ekselensia Ambasador de Israel yosef Armani, prof. Vlado Kambovski, presidente de la akademia makedoniana, Dr. Valentina Bozinoska direktora de la komisyon interrelijioza de Makedonia, el shef egzekutivo de la akademia de Ashkelon dr. Pinhas Haliwa, sinyor Goran Sadikarijo shef egzekutivo de la Fondasyon del Holokosto de los djudios Makedonianos, onoravle asistencia, buenas tadres.
En esta konferensia dedikada a los djudios de los balkanes, antes de todo keria insistir sovre el fakto importante ke damos a las invistigasyones istorikas i kulturalas de los balkanes i espesialamente a las komunidades ke fueron kreadas por muestros antepasados en Makedonia. Vinimos aki para konoser i entender lo ke fue echo durante sieklos para la konservasyon del patrimonio djudeo español . Vinimos aki para apoyar i enkorajar los miembros de la Akademia de Makedonia en sus lavoros siantifikos. Esto es la razón por la kuala por la primera vez ke una Universitad Israeliana esta kolaborando kon un centro akademiko, koza keme gusta muncho.
Un nombre bastante grande de investigadores israelis participan a este congreso kon el buto de estudiar i en mismo tiempo de konoser la nasyon de este país, no muy konosida en la media mundial. Grasias a las relasyones ke establisio el Prof. Shmuel Refael, aze unos anios, kon los miembros de la Fundasyon del Holokosto de Makedonia oy estamos aki para apuyar este enkontro ke será un evenimiento importante en la historia del sefaradizmo balkaniko. Ademas muestro centro Ladino en Bar Ilan fue uno de los primeros ke miro de dar ayudo i apoyo a muestros amigos de Skopje, para ke sus sonio de organizar esta konferensia finalmente se realize. Trushimos aki un grupo abastansa grande de investigadores especialamente de muestro centro de Bar Ilan ke se okupan de azer investigasyones akademikas sovre los diferentes temas de esta zona, i keria rendervos atentivo kon mi modesta otoritad al fakto ke muestro centro konosido komo ser uno de los lideres mundial en los estudios del patrimonio kultural sefaradí se okupara de serka, los anios vinideros de la historia i del idioma uzado por los djudios en los balkanes.
No ay duvda ke grasias al lavoro ke se empeso ay mas de 10 anios en Israel, país onde el futuro del sefaradizmo perdurera, el ladino no esta para despareser tanto presto komo lo pretendieron al inisio del sieglo pasado siertos de los pesimistos linguistikos, gazeteros i eskrivanos en judeo espagnol. Oy se azen bastantes esforsos a todos los niveles para ke el sefaradizmo ke sovrebivio 500 anios dospues del egzilio de los djudios ladino avlantes de la península iberika sea vivo i estudiado en Israel, en diferentes paizes evropeos i sud amerikanos. La mijor repuesta a los ke pensan ke muestra lingua muerera, son los sentros de cultura i investigasyon kreados en las universitades israelianas. Tengo el plazer de anonsarvos ke en serka la Universita de Tel Aviv se dotera de un centro de estudios judeo españoles kreado i finansado por amigos personal de orijin turka. Ansina el nombre de sentros akademikos en Israel yegara a 3. Ademas verso la fin de este anio grasias a la Otoridad del Ladino organismo oficial del governo Israeli, por la primera ves en la historia djudia se organizera ‘el dia sefarad’ a traverso todas las komunidades sefaraditas en el mundo. Konkluo en deklarandovos ke muestra lingua no será en deperdision en los anios vinideros.
Por otro lado a esta okazion, permeteme de rengresiar al deputado, miembro de la Keneset Shimon Ohayon del centro Dayan ke sin sus esforsos esta konferensia no se puedia realizar. Mis senseros rengrasiamentos a todos ke se okuparon de la organizasyon de este enkontro i espesialamente a la signora Ora Kovalkovski sekreteria del centro Dayan ke se dediko dia i noche a esta manifestasyon .
Por supuesto , keria rengrasiar al nombre demi espoza Naime i de mi a muestros amigos de Skopje por sus ospitalidades i enkorajar a todos los participantes de este congreso en sus lavoros fruchiguozos . Ke esto enkontro sea un sukseso particular para todos eyos.
Salud i pas ke mos akompanien.
Selim Salti
Fuente: Rachel Amado Bortnick – Ladinokomunita
