eSefarad Noticias del Mundo Sefaradi
A la okazyon de muestro Aniversaryo…
por Coya Delevi/Estambol
Kon el numero ke resivitesh este mez muestra revista «El Amaneser» esta empesando a su sinken anyo de publikasyon. Esto sinyfika el orgulyo, la kontentes de toparmos kon vozotros.
Una alegria ke se renovela empesijo de kada mez… Asigun mi, esto deve ser la preva de una reushita komuna. Estad siguros keridos amigos, esta reushita no apartiene unikamente al kuadro de eskrivanos, redaktores, editores, ets…
Son los lektores, kero dizir es vuestra fidelidad ke mos esta dando el entuzyasmo moral de perseverar.
Yo, en tal ke eskrivana de la oja Judeo-Espanyol del «Salom» i de mi oja en «El Amaneser», no puedo ser imparsyala. Portanto, no me esto pudyendo detener de pensar ke estas publikasyones dyeron un dinamismo muevo seya al Judeo-Espanyol de muestra komunidad, seya a la lingua en jeneral. Ay komo un muevo entereso en la lingua, aun ke este intereso es dayinda muy flako. Espero ke va a pujar i ke no me esto yerrando.
«Idioma i kultura Judeo-Espanyola» fue la parola del Seminaryo ke se realizo en Estambol antes 5 anyos, en el Enero de 2004. Primer enkontro organizado kon la inisyativa de muestra amiga Karen Sarhon, prezidente de la «Asosyasyon de Investigasyones de la Kultura Sefaradí Otomana-Turka».
Yo konsidero «El Amaneser» komo una de las mas importantes konsekuensias pozitivas de este primer paso del anyo 2004.
Naturalmente no abasta solo meldar. Ay menester tambien de una kontribusyon aktiva, de una partisipasyon de todos muestros amigos para pueder konservar muestro patrimonio kultural. Egzaktamente komo lo dize un proverbo djudio: «kon un golpe no se rompe el lenyo» … Para reushir kale lavorar, tener pasensya, perseveransya i lo mas importante ayudo resiproko.
En este kuadro rengrasyamos a los amigos de las kuatro partes del mundo. Mandaron sus eskritas desde el presipyo de la aparisyon de muestra revista, i estan kontinuando a landarmos. Akiotruna vez va sitar los propozitos del Dr. David Azikri ke mos eskrivyo de Herzelia: «La misyon de «El Amaneser» i de los ke se dedikan a mantenerlo, ayuda a krear una esperansa ke el Judeo-Espanyol no disho su ultima palavra…»
Estas palavras me izo akodrar ls de Karen Sarhon. Muestra amiga aviya dicho en uno de sus artikolos: «…devemos tener la misyon de enkorajar personas de manko de 45 anyos para ke eskrivan en Judeo-Espanyol. Si reushimos a abasjar a esta jenerasyon, alargamos la vida de muestra idioma»
Keridos amigos, esto konvensida ke muestra revista va kontinual a arelumbrar en kada vez ke eya va amaneser. Lo vamos a realizar esto, todos endjuntos. Es por esta razon ke kero eskapar mis palavras kon la yamada ke izo Karen el anyo pasado i ke kontinua a ser valivle: «Ayde amigos, metevos al lavoro ke el tyempo esta pasando muy presto sin ke mos apersivamos»
Realmente keridos lektores i amigos, el tyempo esta pasando muy presto, i estamos selebrando un muevo aniversaryo de muestra revista. Suetamos vidas largas a «El Amaneser», i munchos anyos de reushita.
¡De mezmo mozotros suetamos a «El Amaneser» vidas largas i enkorajamos a sus kreadores a kontinuar kon este maraviyozo lavoro!
Vos invitamos a abonarse para resivir i disfrutar kada mez la revista eskriviendo a elamaneser@gmail.com
