eSefarad Noticias del Mundo Sefaradi
Keridos amigos i amigas.
En el Jewish News de esta semana tenemos un artikolo del Rabino muerto «Raymond Apple» tratando de la Parasha «SHOFTIM» de esta semana. Se dize aki ke tenemos menester de djuezes i ofisiales en todas las entradas.[Devarim 16:18]. En los tiempos ansianos todo se pasava en las entradas. Era aki ke la djente se enkontrava i ande tomavan lugar las transaksiones. Los djuezes tenian sus sesiones. En la orasion en Arameo «Yekum Purkan» se alavan los Djuezes en Shabat en la entrada. Los ke tenian problemas no tenian menester de pasar por la burokrasia para tener un dia en la korte. Savian ke toparian una fasilidad djudisial en la entrada de la sivdad. Ansi el proseso no tomava muncho tiempo. La Natura Judia era de manera ke dinguno puedia imajinarse de no tener djuezes en la komunidad. Es ke tenian menester de ley por kualo era instinktivo?
La Administrasion de la djustisia kontenia 7 Leyes por los ijos de No’ach para asegurar ke teniamos la Korte i la Djustisia komo Sistem.
«TZEDEK, TZEDEK TIRDOF» en kurto Djustisia»[Devarim 16:20]. Tzedek se traduse a djustisia. Ma la vista del TARGUM es diferente i dize «KUSHTA/Verdad» «Segir lo ke es djusto». Segun «Nathan Marcus Adler» en «NETINAH HA GER» no egziste una distinksion entre Djustisia i Verdad ke es un konsepto kontra el otro. El Profeto «Zechariah» komo otros eskritores, ya aze una distinksion. El dize en «PIRKEY AVOT» «Djuzgaras kon la verdad, djustisia i paz». La verdad indika topar los faktos verdaderos. «Ke es ke se paso?» La djustisia mira a los motivos «Porke kada persona lo izo?» Paz es al intereso de todos. Ke veredikto es mijor en las sirkunstansias?’ Todas las 3 son difisil a kumplir. Por esta razon se dize sigelas para ver si no son elusivos.
A este punto de su diskorso el Rabino Raymond Apple disho «Ensenyi La Ley Djudia por munchos anyos en la Universidad para impresionar a mis estudiantes ke nunka avra un kavzo avierto i serrado ande la sola koza ke tienen ke azer es mirar al livro. Dingun djuristo puede ser sierto de topar 100 por 100 la repuesta djusta. Ma dinguno es prevenido de bushkar la repuesta. [Tuve la okazion de enkontrar a este rabino sea en el Bet Din o en la Sinagoga de la sivdad. Avlando de su karriera el disho ke al prinsipio kijo ser un avokato komo otros i un dia le vino la idea de ser Rabino i estudiar las Leyes Djudias.
ZIHRONO BERAHA
Fuente: Ladinokomunita
