eSefarad Noticias del Mundo Sefaradi
Keridos amigos i amigas
En el Jewish News meldi un artikulo presentado por «Zelda Cowthorne» tratando de «David Krakauer» ke djuga una meskla de Jazz i Klezmer. Esta banda se prepara a venir a Sydney i Melbourne
Saludes a todos
——————————————————————————-
DJUGAR «TAVLI/SHESHBESH/BACKGAMMON»
Mi padre era Maestro de Backgammon. Si tu saves djugarlo esto no se kompara kon la manera ke djugava el. Mi padre se engrandesió en Baghdad, djugando en kasa i mirando a otros. Ir al kafe para djugar era su djugo. En kasa djugava kon mi madre i mis parientes nos ensenyavan a djugar. No era una kosa normal para las mujeres en el Medio Oriente aprender este djugo. Ma eya avia demandado de su padre en un tiempo de desespero, kuando estava asentado en kasa, al perder moneda en su negosio. Mi padre mirava i mis experiensias eran limitadas al Día de Alhad por la tadre kuando venian los amigos para djugar. Me asentava al lado de mi padre, en frente a su amigo Albert, antes de ir al jardín. Estavan ayi todos exsitados, echando gritos i aziendo bruido. Pensava ke se estavan peleando. Ma al fin del djugo todos estavan amistosos, riendo i aziendo shakas.
Djugar era un egzersisio fisiko i mental para mi padre. Su puerpo era animado kon enerjía. El buto era de blokear, al punto de no pueder mover mas asta ke uno sea relashado. Ansi mi padre termino ser prisonero de su djugo. En tiempo de la Segunda Gerra Mundial,lo yevaron a la prision de «CHANGI CAMP’ en Singapore, kon otros 100 Judios. Esto tuvo un efekto en su vida. Bivia en un otro mundo. El Singapore de antes de la gerra, no egzistía oy. El tiempo pasava en djugando Backgammon. Kuando se sentía perdiendo, deshava al otro en la baza de opposision, blokeandolo, asta ke el inchia su baza. Ansi ganava. La kestión era por kuanto tiempo? Era un kalkulo de riziko. Lo mismo se pasava en su vida. Fue de esta manera ke tomo a la famiya de Singapore i se la yevo a la Australia.
Estava ganando el pan en business kon otros. Despues lavoro a su kuento.
Lo izo mismo kuando las arterias del korasón estavan tapadas. Aksepto ke le metan «stents» kontra su voluntad, metiendo un stent kada ves. 2 mezes después mi padre se murió. Yo estava djugando kon mi ija i por la primera ves estava ganando. Tuve 3 dobles de 6 uno detrás del otro. Me vide tornando a la vida ke no estava ayi mas. Senti ke mi padre estava riendo detrás de mi. Ma esta ves no era su djugo.
Trezladado por Simon Geron
Sydney
Fuente: Ladinokomunita
