eSefarad Noticias del Mundo Sefaradi
Keridos amigos i amigas, en «Sihhat Yossi/Diskurso de Yossi» ke salio en el Jewish News,se avla komo nasio la Sinagoga. Los kales viejos i muevos,grandes i chikos, elegantes i modestos, kales de los Sefaradim i Ashkenazim vienen en munchas formas i dimensiones. Ma ke es su esensia i muestra koneksion.?
DEL MISHKAN A LA SINAGOGA
Mos topamos en una parte de la Tora ke se melda durante un anyo i ay 4 Perashiyot tratando del Mishkan o el Tabernakulo ke akompanyo a Israel pasando por el dezierto. Fueron el punto de konsentrasion en los primeros siglos de la egzistensia de Israel en la Tierra Santa. Ke dizen las Perashiyot? Se avla aki en detalios komo kada parte fue konstruida, el material ke se utilizo i a kualo paresia una vez ke estava pronto el Mishkan.
Se demandan munchos ke se ambeza de esto?. Se pensa al Beit HaMikdash ke iva ser paralelo al Mishkan. Para responder a esta kestion vale la pena mirar a los 3 aspektos. En primero kayen los detalios ke trata del material. Despues se toma kuento del fakto ke todos tienen ke ayudar para krearlo. Rikos i proves tenian ke kontribuir igualmente. Finalmente se melda «Ve Asu Li Mikdash V’Shahanti B’Tocham/Me izieron un sanktuario i me echi ayi».No dize «me va echar ayi» Esto kere dizir ke kuando se fragua el sanktuario va morar en kada uno de eyos. En el korason de kada uno en Israel.
El Rebbe Kotzker disho «Ande se topa el Dio? Ande tu Lo deshas entrar. El Dio no bushka tavlas i piedras «Rachmana Liba Ba’El /Bushka el korason»
Mismo para nosotros en la Diaspora despues de una millenia ke el Mishkan fue konstruido se topa el signo de konstruir Kazas Del Dio kontemporarias. Aki los detalios kontan. Se utiliza el mijor material i el mas riko. Ma a la fin vamos a tener un edifisio frio ke sierve a nada. Aparte de su forma fizika el Beit Ha Knesset tiene ke ser un lugar para la Komunidad. Tenemos ke tomar al Dio en mnuestra vida diaria.
Malgrado esto Moshe Rabeinu embio un mesaje diziendo ke kada uno tenia ke dar Un Medio Shekel al anyo por el templo. Oy se ve ke munchos se van al Shul i no dan nada. Pensan ke el Shul estara ayi siempre. Oy la kontribusion se aze en reservando un lugar en la Sinagoga en las Fiestas Grandes komo Rosh AShana/Yom Kipur. Munchos lo deshan a otros. Ken va mantener el Kal? Ken va pagar el salario del Rabino? Esto se puede aplikar a todo.[Komo dizen en Inglez «Pulling One’s Weight»
Tradusido por Shimon Geron, Sydney
Fuente: Ladinokomunita
