eSefarad Noticias del Mundo Sefaradi
Keridos amigos y amigas
En el Jewish News de esta semana, Ben Sales i Stav Levaton presentaron un artíkulo tratando del atake de Israel a Entebbe el 1 de djulio de 1976.
El Primer Ministro Yishak Rabín sentado en Tel-Aviv kon su sírkulo de konsejeros i el personal de las Fuersas de Defensa de Israel (FDI) estavan avlando de unas novedades negras.
Un Avión de Air France en kamíno de Tel-Aviv a París via Atenas fue arrevatado i yevado a Uganda kon 240 pasajeros, de los kuales 83 eran israelianos. Se estavan enkontrando por sejena vez i el govierno estava konsumido por esta kriza. Rabín mizmo fue antes la kabeza de las FDI i disho ke no tenían la kapachidad de operar para liberar a los aferrados. En primero esperaron ayudo internasional i al ver ke no venía, pensaron de negosiar kon los terroristas, en alavando a Idi Amín para evitar ke entre en la prensa. Solamente después de unos días, la operasión sekreta i peligroza se izo posivle. El Ministro de Defensa, Shimón Péres disho ke se avía desidido de embiar unos komandos a Uganda, ke sería echo por la primera vez. Rabín a punto arrekojió en una reunión espesial del Kabineto ke inkluía a Yigal Alón i a 3 otros miembros.
El grupo se enkontró 18 vezes durante la kriza. El Presidente fransez komunikó a los ofisiales de Israel ke la Fransia era responsavle por los pasajeros a bordo en Entebbe. I la Fransia, esperando ke los terroristos ke inkluían también a miembros del Frente Popular para la Liberasión de Palestina i 2 almanes de las Sélulas Revolusionarias, embiaran sus demandas para negosiar. Sus demandas eran de liberar a los “freedom fighters» en Israel i otros paízes. Ningún paíz tenia kudiado del destino de los israelianos i djudiós. Ansí era una kuestion de Israel i los djudiós.
Idi Amín no era amigo de Israel i en 1972, el diktador avía rompido las relasiones kon Yerushalayim. El “attaché militar” de Israel en Kampala, Barukh Bar-Lev, se kedó en términos buenos kon Idi Amín, ma solo komo un sivdadano privado para no dar la impresión ke Israel estava negosiando en direkto. Barukh disho a Amín, «Tienes la oportunidad de ser rekonosido en la istoria komo un pasifikador». Amín paresiendo reseptivo disho, «Si Israel no responde a las demandas, van a kemar el avión kon todos adientro».
El tiempo pasando, la repuesta de Israel fue ke «negosiar kon los terroristos era kontra la polítika de Israel». A la fin, los ofisiales se desidieron ke era menester de azer una operasión militar para arresgatar a los arrevatados.
En la demanyana del 1 de julio, aserkándose la data límite de Rabín i Péres, disheron ke la «Ora Zero» estava viniendo i no se savía lo ke pasaría i ke tenían ke romper el ultimátum. Amín fue notifikado ke Israel estava preparado a negosiar a traves de la Fransia. Fue anunsiado de deshar partir a los rehenes ke no eran israelianos. Para tomar esta desizión era nesesario ke sea akeptado por el gobierno i el sigiente día era Shabat. Poko después, Rabín dio la orden de preparar una operasión militar komo segunda opsión. Las sirkunstansias se avían trokado el sigiente día i se demandava de los ministros ke se keden en Tel-Aviv por Shabat para diskutir esta desizión. Avía el risko de pedrer vidas siviles.
Poko después de la ora 15.00 afirmaron la operasión i los aviones kon los komandos partieron a Entebbe a una distansia de 4000 kilometros. Yegaron ayí i en unas oras la operasión estava kompleta i los arrevatadosse tornavan atrás a Israel. 3 aferrados fueron matados endjunto kon el komandante Yonatán Netanyahu, el ermano del Primer Ministro Benjamín Netanyahu. En un enkontro en este día, Péres izo el elojio de Yonatán Netanyahu, diziendo ke fue uno de los mejores gerreros del pueblo djudío i ke esta operasión sería nombrada en memoria de Yonatán Netanyahu.
Malorozamente, después de eskapar el resgate, salió ke una otra rehén avía muerto. Dora Blokh, de 74 anyos, sivdadana británika-israeliana ke estuvo en el ospital en Kampala i se aogó de lo ke avía komido. Idi Amín en su kolera avía ordenado de matarla en el ospital al lado de unos miembros del ekipaje.
El rezultado fue ke Britania rompio las relasiones kon Uganda. En 1979 durante la invasión de Uganda por Tanzania, Dora Blokh fue repatriada a Israel donde se topa oy enterrada en Ar Amenuhot en Yerushalayim.
Rabín disho el 5 de djulio ke ningún paíz estava mesklado en esta operasión. Sovre todo los evropeanos i los amerikanos. Tenía ke ser una operasión de sorpreza i no savía en ken podía tener konfiensa. En los fransezes? En los almanes? En los británikos? I no siempre en los amerikanos… Kuando se trata de un sekreto.
SALUDES A TODOS
Tradusido por Simon Geron de Sydney,
Fuente: Ladinokomunita
