eSefarad Noticias del Mundo Sefaradi
Ver todos los artículos de esta sección >>
PIMIENTON, CHARLESTON
BIBERISYON I ATMASYON !
El espanyol sefaradi tiene un korason muy
ancho… Le plaze inchirse kon toda manera
de biervos zurzuvis ! Por ande lo travash
aya se va.. riyendo… i todo le yakishea…
Ke lo bueno mio !
A el ladino lo mas le plaze komidas, mezas
de fiesta, una kuzina gloriyoza, mujeres lokas
por ser elegantes, musyus kon chapeyos i
vistidos echos ande los shastres alavados….
kreaturikas intelijentes ke te demandan kozas
mas de lo ke les puedes responder i una umor
sin fin kon konsejikas ke no te deshan ni
durmir porke no puedes serrar el livro !
Oy tenemos pipinos… pardon pimientos
en el menu ! Pimientos dishe ? Ke verguenza !
Pimentones ! No no pimienton ! Ya lo topi i
lo vo aferrar para ke no se fuyga ! Pimienton
ven aki……Allado de mi ! Ya esta aki mirando
me kon ojikos vedres 🙂 flakito i alto m’esta
azyendo del ojo !
Tiene una famiya…..Ayyyyy ke m’esta avlando ?!
Lo oyesh ?
– Me yamo pimienton i esto namorado de la tomata 🙂
En vezes me kizdireyo (m’inyervo) i kemo la boka
de la djente porke solo pensan a kemarme bivo en
la lumbre o en el gas ! El azete d’oliva amaha mis
dolores i kon ajo so tanto savrozo ke la djente
s’olvidan ke ay otras komidas de komer !
Tengo una famiya muy grande. Las ijas de mi
tio, de la parte de mi madre, son todas godras,
Se yaman piperushkas i no keman 🙂
Tienen kolores ermozas porke se van al kuafor kada nada !
Unas se azen kolor de berenjena kaji pretas, a
las otras les plaze la kolor de la karota, unas
son blondas o amariyas i las mas dulses son las
koroladas kayadikas…
Las ke no estudiaron kedaron vedres ! Esto es…
Todas estas se uzan para las mijor salatas ke plazen
a los ombres !
Las vedres delgadas i godras son buenas para inchir.
Las mujeres las inchen kon karne o aroz i sevoya,
adjustan pinyones i uvas sekas verdura…
«Las Dolmas » ! Son nombradas las ijas de mi tio, eh ?
Tenemos en la famiya los «charlestones » tambien.
Eyos baylan noche i dia ! No saven kemar i tienen
un korasoniko de oro ! Las mujeres las buyen i
las echan en el vinagre kon sal i ajo i un poko de
agua….Ya son muy aver livyanoz ! largos…
mas godros de mi ma mas delgados de las ijas de mi tio.
En lugares serka del sol ande se tosta el benadam
tenemos inyetizikos, inyetizikas, tias i nonos…
Estos son chikichikichikitikos ma kemaaaaaaaaan !
Los yaman la pimyenta ! Oyveeeeeeeee ke malos ke son !
Mijor no avlar de eyos ke ya me kemi solo de nombrarlos !
Pretos i korolados i blankeyados…..Aya ke esten !
‘ Yo me kaygo i no digo mas nada !
Ya lo oyitej ! ‘
Sharope Blanco
Sefaradimuestro
En esta seksion Sharope Blanco, fundadora de Sefaradimuestro, un foro en Internet para korrespondensia sovre kultura sefaradi kon el buto de ranimar la kultura de los djudyos sefaradis, va a partajar kon mozotros su penserios i kriasiones literarias.
