De la pluma de Sharope: NEGOSYO A LA JUDIYA

En esta seksion Sharope Blanco, fundadora de Sefaradimuestro, un foro en Internet para korrespondensia  sovre kultura sefaradi kon el buto de ranimar la kultura de los djudyos sefaradis,  va a partajar kon mozotros su penserios i kriasiones literarias.

NEGOSYO A LA JUDIYA

Un arabo estava pasando el dezyerto a pye porke se le aviya murido su gameyo en kamino. Estava muerto
kansado i su lingua se le estava apegando al paladar de sed… No le kedava ni una gota de agua…

Vido un hombre ke estava vendyendo kravatas en akeya kalor de tostar ! El hombre se aserko de el i le propozo de merkar una kravata ! El arabo lo kedo mirando kon ojos grandes avyertos :

– Sos loko ? Ken tiene de menester de kravata en este dezyerto…. Esto para murir ! Tienes agua ? Es esto lo ke kero !

– Yo no tengo agua ma dospues de 2 kilometros ay  un restaurante ke te alavo ! Venden bivientas freskas i
yeladas, salatas, komidikas de kaza…. Te vas a namorar ! Ma…. Por favor, merkame una kravata… Te se puede azer de menester… Nunka se save !

– Vate de aki ! No kero ni kravata ni kakuleta ! Dezaparese de mi kamino. Veygo ke tienes kipa i barva. Sos Judyo ! Salites en frente de mi para burlarte de mi ! Riyirte de mi estado…. Vate al diavlo !

El arabo se emburujo en su djallabiya i le vino fuersas para kaminar fina ande el Judyo le aviya dicho de ir…

Estava pensando en su kavesa a las limonatas ke iva bever yeladas buz ! Teniya ambre… Se puediya komer un kodrero entero ! Ahhhhhh si solo no era tan leshos este restaurante.. Kamino, kamino i vino enfin al lugar ke tan dezeyava yegar. Un restaurante kasher ! Atyoooooo ! No embarasa… No es a esto ke estava pensando agora…. Kasher ke seya…. Iva bever limonata ! Ma…. Ke es esto ? El ke le avriyo la puerta estava vistido de un smoking i teniya guantes blankas…. De aryento viniya un ayriziko fresko de arrebivir muertos….
Ken save kuantos klimatizatores estavan lavorando…… Es esto ke deviya ser el Ganeden…

– Ekskuzame Efendi ! No puedes entrar sin kravata al salon.

– Komo ? Ande keres ke tope kravata agora ?

– Esto no lo puedo saver estimado Efendi, ma es la regla de muestra Kaza.

– Yamame el patron ! Le vo avlar yo….

– El no esta aki.

– Ande esta ?

– Vende vistimyentas i kravatas a unos kuantos kilometros de aki. Se yama Chelebon Levi. Lo vash a konoser de su barva ruvya i de la kipa griza en su kavesa….

– Si si si…. Lo konosko ! Me vo ir a romperle la kavesa !

– No vo lo konsejo estimado Efendi…. Porke devo avlar por telefon kon el antes de desharvos entrar a muestra Kaza. Ay munchos ke trataron de….

– Bueno, bueno ! Ya vo tornar….. Mil guerkos del Gehinnam !

Ah Judyos ! Rasa de dezgrasya de personas ! Solo de eyos salen ansina de kavesas burakadas !  Kualo puedemos azer ? Tienen a los Amerikanos detras. Mos atan las manos i los piezes mizmo kon kravatas…