De la pluma de Sharope: KUZGUNCUK

En esta seksion Sharope Blanco, fundadora de Sefaradimuestro, un foro en Internet para korrespondensia  sovre kultura sefaradi kon el buto de ranimar la kultura de los djudyos sefaradis,  va a partajar kon mozotros su penserios i kriasiones literarias.

KUZGUNCUK

KUZGUNCUK,  la namorada de los pintores ke vienen para pintarla las demanyanadas, a medyo diya kuando el sol esta alto o las tadres kuando una dulse kolor se espande en sus bodres de mar o en las kolinas, en sus kazikas tan attraktivas kon las guertas inchidas de arvoles de fruta, de flores golorozas, kon banketikas para ke las mujeres se asenten kuando terminan sus echos kon las vizinas, tomando kafe kon biskochos o savorando los pipinos freskos de la guerta ke vienen de ser mundados para ser ofridos kon orgulyo i amistad….

Lo mas de los bodres del majestuozo Bosphoro, ademas en la parte Aziatika ande se topa KUZGUNCUK, son la proprietad privada de los muy rikos ke fraguaron sus kastillos o sus villas muy sharanfonfon kuando dayinda era permetido…  Antes muy munchos anyos.  De manera ke no los pueden meneyar de sus tierras.  Oy, por seguro ke no se puede lograr permission de serrar el bodre de la mar ke deve kedar kon akseso al publiko.  Era lo mizmo por la vanda Europeana del Bosphoro i ay munchos anyos ke sin tokar a la proprietad de la gente, izyeron pasar un ancho kamino ensima de la mar ande se puede pasear, mirar el panorama en konduizyendo o asentarse para peshkar o pasar la hora kon plazer.  Era un grande projekto i seguramente ke valyo la pena !  Me imajino ke una koza asemejante puedra afitar tambien en la parte Aziatika…. Es vedra ke ay munchos lugares avyertos, kafes i restaurantes al bodre de mar ma no es sufisiyente.

KUZGUNCUK  nunka era un lugar kon muncho bruido. Peshkadores i agrikultores  pasavan sus vidas en el kalmo de este kazal  tan ermozo.  Empesavan sus diyas debasho de la solombra de un arvole sekular kon kezo blanko, simit  (komo el begale) i el chay perfumado ke dayinda se sierve en chikas kupas kon «talya» a medya altor.   La golor del iyod i del musgo (yosun/mousse/moss)  ke yega kon el ayre fresko lambyendo las barkas , arrebive las personas i las gavyotas siempre okupadas a bushkar pishkado o pedasos de simit ke les echan.  Grandes blankos pasharos, bivyendo en las kostas del Marmara i de sus izlas.

KUZGUNCUK  se arrebive a la vinida de kada primavera. El sol arekayinta no solo las karas ma los korasones tambien.

Fue morada des del tiempo de BIZANS i dayinda es una djoya de los bodres Aziyatikos del Bosphoro. Oy biven unas 15.000 personas.  En el siglo 17  se puede dizir ke era un kazal Judyo.  Mas tadre se installaron Gregos ;  i los Ermenis se adjuntaron en el siglo 18 tambien.

Es uno de los muy raros lugares  (En ORTAKOY,  en los Bodres Europeanos del Bosphoro ay lo mizmo..) ande se topa Sinagoga, Meshkita i Eglisya lado kon lado.  Un muy ermozo simetaryo Judyo se topa en la kolina ma oyi ke no estan mas enterrando ayi.  Solo los ke tyenen sus luagres merkados.

Es en el siglo 19 ke los vapores empesaron a servir el Bosphoro i transportar personas al chiko puerto de Kuzguncuk.  Esto kontribuyo al desvelopamiento del kazal.   El puerto i el embarkader fueron fraguados dospues del grande fuego de 1865.  Es dospues de este fuego ke Kuzguncuk se puede dizir  se fraguo de muevo.  Vemos kazas de 2 a 4 etajes lo mas de tavla dospues del primer etaj echo de manera konvensyonal.

Kuzguncuk es un puevlo de USKUDAR en los bodres del Bosphoro en la parte Aziatika de Istanbul.  Es vizino de Pasalimani i Beylerbey tambien muy ermozos kartyes de Uskudar ke tyene 44  kartyes.

En 1914  aviyan  70  famiyas muzulmanas, 250 famiyas gregas,  1600 famiyas ermeniyas, 400 famiyas judiyas i 4 famiyas etranjeras.  En 1933  lo mas eran Judyos. Dospues viniyan los Gregos, los Turkos i los Ermenis. En todo  aviyan 580 kazas kon 4000 personas morando en el kazal.  Oy en diya kuaji todos son muzulmanos i no kedaron mas minoritaryos. 4000 personas fueron kontadas en 1994.

Sharope Blanco