eSefarad Noticias del Mundo Sefaradi
En esta seksion Sharope Blanco, fundadora de Sefaradimuestro, un foro en Internet para korrespondensia sovre kultura sefaradi kon el buto de ranimar la kultura de los djudyos sefaradis, va a partajar kon mozotros su penserios i kriasiones literarias.
Ver todos los artículos de esta sección >>
ANYOS DE LA EGZISTENSYA DE LOS JUDYOS
EN TURKIYA.
El muzeo era la vieja sinagoga ZULFARIS ke sefraguo en Karakoy-Istanbul antes 342 anyos. Este khal fue frekuentado por los Judyos sefaradis entre los anyos 1671 – 1985. Se topa serka de la KULA ande era el sentro de la grande komunitad Judiya fina los anyos 1955, antes de la emigrasyon en masa de los minoritaryos de Turkiya a Israel i a todos los otros payizes del mundo dospues del progrom del 6-7 de Septembre ke fue organizado kontra los gregos de la sivdad ma ke en realitad teniya el motivo de atakar no solo los gregos ma judyos, ermenis i levantinos tambien.
El muzeo da informasyon muy kompleta i aze konoser a los ke lo vijitan, todo modo de objetos ke fueron uzados por los judyos de la Komunitad, durante el tiempo ke bivyeron i biven dayinda en Turkiya, el payis moderno ke suksedyo al viejo Emperyo Ottomano ande los judyos sefaradis fueron arrekojidos i resividos a brasos avyertos por Sultan Bayezid II en 1492.
De los 120 000 Judyos ke fueron repulsados pormodo de la inkizisyon en la Peninsula Iberika, 90 000 de eyos yegaron al emperyo, lo mas a Konstantiniye – Istanbul oy en diya -, ke era la kapital del Emperyo. Kon tiempo los judyos yegaron a todas las partes, prosperaron, espandyeron sus savyedura, sus siensya, sus artes, sus eksperyensyas i izyeron bivir sus kulturas, sus lingua i sus tradisyones sin nunka alesharsen de eyas.
El muzeo avriyo sus puertas en 2001, por los 500 anyos de la yegada de los judyos al Emperyo. Fue la ideya de selebrar este diya por el jurnalisto judyo Nisim Benbanaste en un artikolo suyo ke eskrivyo en 1982.
Kuando se entra, ay en primero un lugar para rogar. Esto es la seksyon etnografika del muzeo i se topa aya un almaryo ke simboliza el kazamiento.
Se pueden ver muy munchas fotografias en las paredes del muzeo ke mostran las bodas ke se izyeron en todas las partes del payis entre los anyos 1876 i 1976. La vistimienta ke se ve es la vistimienta autentika ke mostran tambien las tradisyones del puevlo judyo. En esta seksyon se topa una grande siya ke se uzava en la seremoniyas de la sirkonsizyon.
El muzeo da muncha importansya a la amistad entre los Turkos i el puevlo judyo i mostra fina ke punto los unos fueron inspirados i influensados por los otros durante 700 anyos…
Dospues de la seksyon etnografika se asuve ariva i se entra en una segunda sala. La primera koza ke chafta el ojo es una grande fotografiya de Albert Einstein. Se puede ver una letra de Einstein al Prezidente de Turkiya dizyendole ke la Turkiya devriya avrir sus brasos i salvar los akademisyenes judyos. Dospues de esto, munchos diplomates dieron pasaportos turkos a los judyos savyos i los salvaron de los kampos de la muerte. Estos akademisyenes estan mostrados i kommemorados en el muzeo.
En todos los muzeos judiyos se topa una parte konsakrada al Holocausto. En este muzeo ay una seksyon para «honorar» solo porke los judyos de Turkiya fueron egzemptos de las horrores ke konosyeron los judyos de los payizes de Europa. Las estreyas amariyas ke los judiyos deviyan tener ensima de sus vistimienta son tambien amostradas para dar una ideya de lo ke sufriyeron los judyos en akeya epoka.
El pedaso el mas valorozo del muzeo es una Hanukiya echa por un artisto judyo del siglo 19. Por una parte de la Hanukiya se ve la forma del kreshente i de la otra parte la luna i las estreyas. Las Hanukiyas son las piesas las mas importantes del muzeo porke demonstran kuanto los judyos son attados a sus kultos.
El mas viejo objekto del muzeo es un livro publikado en 1512. Es el lavoro epiko kompleto del Midrash Tehilim ke se topo en Alemanya i se trusho de aya al muzeo. Se arrekojyeron todas las piesas ke egzisten en el muzeo de las famiyas judiyas ke fueron kontaktadas para la donasyon de ovras ke demonstrariyan la kultura judiya. Es una eksperyensya inolvidavle por lo ke se siente kuando se vijita este lugar.
Unas diez mil personas vijitan el muzeo kada anyo vinyendo de las partes las mas leshas del mundo komo el Chile i el Japon. Personajes turkos muy importantes tambien vijitaron el muzeo komo los Prezidentes, primer ministro, ministros i shefes del estado major.
Sharope blanco
Istambol
Sefaradmuestro
