eSefarad Noticias del Mundo Sefaradi
Andalusia, Asturia, Aragon
Katalunya, Kastilya i Leon…
Oygo sus gritos en mi korason
Tierras ke reklaman Yehuda i Shimon…
Mis tierras en la dulse Sefarad
Muestras kazas derrokadas sin piadad
Sus ventanas oskuras i serradas
Las guertas ande se engrandesen espinas…
Toko a mis rekuerdos, leshos en mi chikes
Veygo mi nonika asentada, yo esto en pies
Del brazero saltan senteyas, se tostan los panes
Los komemos kon manteka, uvas sekas i muezes.
Dospues…. Dospues sus ojos se mojan
Tiene ojos de mar… Una dolor…i sus ojos yoran
Kuando me konta ke grandes barkos mos yevan
Pasamos diyas en mar fina ke en un puerto mos deshan.
Dospues… Dospues me konta mas : Sefarad aparese
Ke splendido payis….Sus flores, su sielo, aya una fuente…
Sus palasyos, los muros i el kastilyo arriva, en el monte
El viejo simetaryo judyo, la chika sinagoga en el Este.
Muestros bisaguelos antes mas de kinyentos anyos
Desharon atras sus bienes, sus lavoros i sus keridos
No kijyendo inyegar la Ley i sus santos Estudyos
Refuzaron la Kruz, otras kreensyas i ser Christianos.
Los konversos fueron dezgrasyadamente kastigados
Los ke fueron baptizados ma guadron sus uzos
Fueron arastados, juzgados i kemados bivos…
La inkizisyon firyo i los Judyos fueron egzilados…
Mi nonika kontava lo ke saviya de su aguela
En la dulse lingua de Sefarad tan leshana….
Kantava komo las madres kantavan en Granada
Baylava komo las novyas baylavan en Sevilla.
Oy, yo tengo los anyos de mi nonika
Digo a miles i a miles mi amor por la Espanya…
Eskrivo historyas i poeziyas en mi lingua
«Sefaradimuestro» illumina, briya komo una estreya.
«Sefarad org.» es su muy amada ermanika
El tiempo bola i la vida es muy kurta
Ventisinko anyos pasaron des del primer diya !
Ventisinko anyos de lavoro, ventisinko anyos de glorya…
Biva «Sefarad org.» dedikado al Sefaradizmo !
«Sefarad org.» la alma de Moise i de su ekipo !
Biva «Los Muestros» ke mos yama poe este anniversaryo !
Munchas grasyas por el esfuerso i un grande applozo !
Keridos, no somos mas ke un punyado…
El Holokausto mos korto las alas i el reflo…
Kon todo lo ke pasimos i el duro destino
Devemos aunarmos, sostenermos i siguir adelantando…
Sharope blanco
El 9 de Junio 2014
en BODRUM
En esta seksion Sharope Blanco, fundadora de Sefaradimuestro, un foro en Internet para korrespondensia sovre kultura sefaradi kon el buto de ranimar la kultura de los djudyos sefaradis, va a partajar kon mozotros su penserios i kriasiones literarias.
Ver todos los artículos de esta sección >>
La nostalgia de aquella Sefarad de nuestros ancestros, transmitida por generaciones cual preciado vinculo afectivo, viene aqui expresada en la hermosa poesia repleta de añoranza que nos ofrece nuestra Amada Amiga Sharope, con el sentimiento que imprime en todo cuando hace y dice …
Una Sefarad que pervive a traves de los recuerdos colectivos… idealizada tal vez con el trancurrir de los siglos, pero fiel sin embargo a la evocacion que en nosotros inspira siempre su dulce nombre …
Gracias Sharopika por tan bella descripcion, aguzada tal vez por la distancia de una interminable diaspora, que nos aleja irremisiblemente, de aquello que tanto hemos amado …