eSefarad Noticias del Mundo Sefaradi
MELODIYAS ABRASAN EL AYRE
La vida bola bola kon rapides
No se save komo yego la vejes!
Ven, toma mis manos, apretalas!
Valsaremos ensima de las nuvlas…
Oyes estas notas melodiozas?
Kantan kantos de muestras bis-aguelas
Puedeser la tuya i la miya eran amigas
Ken save.. En Smyrna o en Asturias…
Ven te yevare ande moran las flores
Las koloradas i las amariyas ke amates
Mirar las bizbaz bezar sus amantes
Para el miel, el mas dulse de los amores!
Amigita, ke mos ofre la vida, ke es su regalo
Mas ke el kudyado, las ansias i el karinyo?
La sudor de muestro duro i interminavle lavoro?
La dulse felisitad i tivdas lagrimas por seguro!
Es mozotros ke pintamos kon bivas kolores
El grizo del diya, dezapuntamientos i las dolores
Adornamos de dantelas i de tamizada luz las noches
Noches blankas ke oskuresen, yevan muestra manseves.
Oy son sorizas ke enfloresen en mis lavios
Aprendi tanto de estos diyas largos i kurtos
No tengo mas espanto dingun en mi korason
No tengo amargura, ma solo una klara vizion.
La vizion de un mundo de paz, sin mintira i maldad
Gente karinyoza, gente feliz kon muncha seguritad
Un mundo de una mizma lingua, justisya i serenitad
Di-o, el Rey, i la Eternitad para toda la humanitad.
Sharope Blanco
14 de Julyo 2011
http://groups.yahoo.com/group/Sefaradimuestro
