De la meza de Medi: EL CHAPEO, un kuento de mi padre

Medi Cohen-Malki es nasida i mora en Yeruyalayim, de padres ke yegaron de Izmir. Tiene estudios en la Universaidad de Yerushalayim, Profesora, poeta i kompozitora, konduse un program de radio en Kol Israel.
Mos eskrivira en esta seksion sovre distintos tema de la istroia, kultura i kostumbres sefaradíes i tambien de aktualidad, asigun sus investigasiones.

Ver todos los artículos de esta sección >>

EL CHAPEO

MI padre es Moshe (Moiz )malki. Nasido de MIlas i despues fue kon su famiaya a izmir. En el 1950, vino a Yerushalaim, aki se kazo kon mi madre Djoya MIles (Judit) y es padre de tres ijas. Ente otras, el es poeta, i le gusta pintar i eskrivir en Ebreo i en ladino. Konose munchos kuantos de muestra tradision i siempre mos los konta.
Aze dos o tres mezes ke mi padre me konto este kuento.

________

Un ombre, avlando en la kavane kon sus amigos, konto ke su padre bive en un kazal aleshado, i ya azia muncho tiempo ke no lo avia visto, i ke el pensava de partir i de verlo, enteresarse por su salud i pasar en el unos kuantos dias.

Oyendo esto, un ombre ke estava asentado afuera de esta parea, salio koriendo de la kavane, entro a una butika de chapeos ke se topava en la mezma kaleja, merko un chapeo, vino korriendo, se aparo enfrente del ke va partir i le disho:»Senior, mi padre tambien bive en el mezmo kazal, al kual tu pensas de partir. Te rogo ke me agas un plazer, de dar este chapeo a mi padre».

Ma, kuando el ombre arivo al kazal, le disheron ke el viejo ya  murio.

Despues de unos kuantos dias, el torno del viaje i vino a la kavane, i todos los amigos se arrekojieron a su derredor i se enteresaron komo paso el viaje, ke trokamientos uvo en el kazal, a ken nkontro, v.s.

I el del chapeo, estava perkurando todo el tiempo a saver si su padre resivio el chapeo ke le embio i si se alegro.

Ma, el ombre ke torno del kazal, si no komo keria darle la novedad triste, bushko achakes a no responder, trokando las palavras i mirando de no vinir kon kara viz a vi, kon el, para no ser uvligado de kontar la verdad triste.

Ma, a la fin, kuando ya no tuvo otro remedio, le disho:»Mira Buena persona, si tu savias lo ke supi en el kazal, tu padre ya  no keria mas chapeo….
Medi kohen Malki
2012 – Yerushalayim