eSefarad Noticias del Mundo Sefaradi
Medi Cohen-Malki es nasida i mora en Yeruyalayim, de padres ke yegaron de Izmir. Tiene estudios en la Universaidad de Yerushalayim, Profesora, poeta i kompozitora, konduse un program de radio en Kol Israel.
Mos eskrivira en esta seksion sovre distintos tema de la istroia, kultura i kostumbres sefaradíes i tambien de aktualidad, asigun sus investigasiones.
Ver todos los artículos de esta sección >>
DOS POESIAS DE NOSTALJIA
Parte II
La djoya
En una butika skura,
Top? yo una djoya klara.
La su perla k’es muy pura,
Supo avlarm’al korasón.
Ma tú saves de ken era
La su piedra de Granada
Ke en la plata st’apegada
I ke troka de kolor?
Era de una prenseza?
A una dam’ aparten?a,
Ke pue’ser era djudía
I mas nunka no tornó?
Akel dí’ en el merkado,
Una boz me disho: “Aspera,
No me deshes ke me muera,
Irme kero yo kon ti”.
I agora yo la tengo,
Sovr’el pecho enkolgada
Día i noche mi pensada
Sta tornand’a Salonik.
Matilda Koén-Sarano, Yerushaláyim, 24.5.2001
(del livro de Matilda Koén-Sarano, Ritmo Antiko, Poezías i kantigas, Yerushaláyim, 2005)
– – – – – – – – – – – – – – – – – – – – – – – – –
Esta semana avlare de la poesia: La Djoya, eskrita por muestra amiga kerida Matilda Koen Sarano.
EL sujeto de la poesia es :la istoria de una djoya ulvidada.
En la primera estrofa la avlante mos konta sovre la topadura de una djoya klara en una butika eskuara. La djoya esta «avlando» a su korason.i depues eya demanda ke pasara a esta djoya?
Eya se adresa a alguno: puede ser ke este es el vendedor en la butika, puede ser ke este es un elemento para pujar la tension i la kuriosidad? Eya deskrive la djoya de plata kon su piedra kolorada (kolorada komo su korason) ke troka sus kolores, puede ser ke esta es una vizion o ke es una enigma non solusionada, una kuriosidad?
En la tresera estrofa aparesen las demandas sovre la identidad de la patrona de esta djoya. Estas son unas demandas retorikas ke kedan sin repuesta klara, la supozision ke apartenesia a una mujer Djudia ke no torno, mos esta yevando a la kuatrena estrofa, ke esta serrando el sirkulo de la kuriosidad. La avlante dayinda se esta topando frente a la djoya en la butika, aki i agora. La djoya la esta yamando para ke no deshe el lugar, rogando ke no la deshe murir dezeando de adjuntarse a eya.
Irme kon ti, sinyifika ke kero bivir kon ti i en ti,ke no kero ser ulvidada. Es ke la avlante tiene una intuision verso el orijen de la djoya?
La sinkena estrofamos ye va al prezente.la djoya esta enkolgada en el kueyo de la avlante. Eya le apartenese, las memorias, no la deshan noche i dia i mos azen tornar al pasado tan eskuro.
La situasion aki es de una muejr ke se esta indo a una butika eskura, ma….ke es ke la atira al lugar? un dezeo de bushkar el pasado? una negra memoria? un kavzo?
Del empesijo de la poesia la atmosfera es muy misterioza, ensupito, eya enkontra este biju ke esta atirando su fantazia, esta djoya esta aklarando la butika i esta aklarando sus sentimientos.
La kuriosidad, en segito de la empresion ke esta djoya esta aziendo, esta pujando su dezeo de envestigar su orijen i de atarse, mas i mas a eya. Eya se keda sin repozo, la supozision ke era de una mujer ke no torno de ayi, mos esta deshando sorprendidos.es ke era de esta mujer pedrida? esta djoya mos esta aziendo akodrar otros dias eskuros, kuando munchos no tornaron. La avlante se esta atando aki al pasado de su puevlo.
Esta djoya esta demandando a salvar su vida. Eya kere adjuntarse a la vijitante de la butika, ke despues la merka i mete fin a sus esitasiones .
Komo vimos, la eskuridad ya esta mensionada en al primera estrofa. El konteksto entre esta djoya klara i la atmosfera en la butika, ke solo estan pujando esta eksperiensa eskura, las demandas i los penserios la estan pintando. La primera empresion de la djoya se esta trokando a una kuriosidad. Esta mujer vino a la butika para merkarse algun biju, o, probablemente por kuriosidad. Kuando veye la djoya i se ata a eya, de alma i de korason i se akodra de su pasado i de sus malos esfuenyos eya la merka i la enkolga en su kueyo, kaje de manera inevitable, eya adjusta entrun elemento a su pasado ke respira todos los dias.
Aki, tambien estamos pasando un viaje en el lugar i en el tiempo i la djoya ata entre los dos.
Esta semana i la semana pasada vimos dos poeszias sovre dos viajes: el primer fue inisiado i planifikado i el otro non planifikado.
Las dos avlantes estan biviendo el pasado, ma, de manera didiferente:la una entiende ke este pasado mas no egsiste i ke su viaje se termina en algun momento, en la ora ke la otra siempre se esta demandando unas demandas ke no siempre tienen repuestas sovre eyas, su viaje, siempre se esta kontinuando.
En estas dos poesias aparese el elemento de la surpriza, ma, en la primera esta surpriza es kaje prevista.
El kadro de estas poesias es diferente. el primer viaje a la sivdad de la chikes i la tornada de eya, i el otro el viaje virtual al pasado via una djoya ulvidada.
Tengo ke adjustar ke a esta poesia fue kompozada una melodia por muestra kerida Betty Klein i ke es kantada por la ija de mi prima Llil Garfunkel:
Ver a Matilda Koen-Sarano meldando la poezia “La djoya» >>
Llil Garfunkel kantando «La djoya»
Medi Cohen Malki
Yerushalayim
