eSefarad Noticias del Mundo Sefaradi
Medi Cohen-Malki es nasida i mora en Yeruyalayim, de padres ke yegaron de Izmir. Tiene estudios en la Universaidad de Yerushalayim, Profesora, poeta i kompozitora, konduse un program de radio en Kol Israel.
Mos eskrivira en esta seksion sovre distintos tema de la istroia, kultura i kostumbres sefaradíes i tambien de aktualidad, asigun sus investigasiones.
Ver todos los artículos de esta sección >>
Tengo el plazer de felisitar a mis dos amigas: Matilda Koen-Sarano i Betty Klein por sus programa maravioza; «De Saragosa a Yerushalaim», ke en pokos mezes (de marso asta djulio de este anio), tuvo gran reushitad i publikasion en Israel.
Todo empeso kuando las dos fueron envitadas a los «DIas de leche i miel», ayi prezentaron tres vezes sus programa kondjunta.
Topandosen ayi. eyas ya fueron envitadas a prezentar este programa en varios lugares de Israel i en kada lugar ke se toparon las resivieron kalorozamente i kon gran emosion.
Ansi ke esta tadrada tuvo lugar, entre otras, en Nes Tsiona, Ramat Hasharon, Yahud (Arkadash). Petah Tikva, Hadera, EN El ULTIMO KONGRESO DEL LADINO DE LA UNIVERSIDAD DE BAR ILAN, i en el kuadro de VINI KANTAREMOS ke tuvo lugar la semana pasada en Yerushalaim. Afilu a Eilat las kijeron envitar, ma akea data eyas ya tenian otra nochada. El fakto ke en Yam Hamelh viene publiko de toda Israel, izo konoser sus programa en todo el pais.
Aki vos adjunto lo ke fue eskrito (en ebreo), en el prospekto de Yam Hamelah «Dias de Leche i MIel», yo trazladi las kozas al Ladino.
«El programa «DE SARAGOSA A YERUSHALAIM, es un viaje ke pasa via los kantes i los kuentos en Ladino i en Ebreo de Espanya de la epoka de antes la ekspulsion asta Yerushalaim del siglo pasado, ayi aparesieron reyes, sultanes, djidios i non-djidios, princhipes i prinsezas, maridos i mujeres i, naturalmente DJOHA, el bufon eternel del mundo del Ladino.
Matilda Koen-Sarano, envestigadora, kontadera, eskritora i poeta, mora en Yerushalaim dezde ke yego a Israel en el 1960. Eya publiko munchos livros i artikulos, da konferensias i ambeza el Ladino. Eya ovra muncho para la prezervasion de la lingua en Israel i en el estranjero. Ultimamente, eya publiko el» DIKSIONARIO LADINO-EBREO i EBREO-LADINO» i el livro:»GIZAR KON GOZO».
Betty Klein: kantante, gitarista, akordionista i arpista, es estimada en todo el mundo en el kampo del kante tradisional i moderno del Ladino. Eya se okupa de la prezervasion de los kantes populares Djudeo-espanyoles, los kualos dokumenta de boka de enformantes ladino-avlantes de varias komunidades Djudeo-espanyolas».
Vos felisito keridas amigas i adelantre ke vaygash para munchos anyos.
Kol Hakavod
Medi kohen Malki
Djulio 2012 – Yerushalayim
