eSefarad Noticias del Mundo Sefaradi
Haim Vitali Sadacca, que escribió y publicó poesía en turco en sus años jóvenes, ahora compone sólo poesía en ladino, su amada lengua ancestral. Los poemas, elegidos por el propio autor, expresan las aspiraciones universales del alma humana para el amor, el afecto, la compasión, la generosidad, la paz y la armonía.
Disfrutaremos en esta sección la habilidad de Haim como poeta y su dominio de la lengua ladina.
«MIRADAS DIFERENTES»
El deseo i el plaser ke siento por eskrivir,
Me dan fuersa a mi egzistensya i a mi bivir.
Ekspliko la vida , los amores kon melodiyas,
Me siento komo borracho,so yeno d’alegriyas.
Kuando veyo un amoroso, miro sus miradas
Ke son yenas de kerensya i kon luzes pintadas.
Estos sentimientos me enspiran i los desino,
Los dekoro kon l’alma, los enkuadro en mi tino.
Ma veyo otras miradas en siertos malorozos
Ke me paresen ver los gritos mudos en sus ojos.
Kaminan kon una facha triste, son desgustozos,
Tienen revolto kontra sus suertes, son angustyozos.
Estas pinturas gravadas en mi tino me matan,
Mis alegriyas poko a poko me se amatan.
Yo, si so el solo espektador de alegriyas
Ke vale si las siyas del entorno son vaziyas.
Siempre deseyi distribuyir las sonrizas miyas
A bivdas, a huerfanos las noches i los diyas.
A kualo vale si yo alkanso a lo ke kero
Si mi entorno bive kon el mismo dezespero.
Haim Vitali Sadacca
Montreal
——————————————————————
«A MI AMIGO KE PRETENDE SER HUMANO«
Alevanta te rogo de tu korason el velo,
Kon dezeo kero deskuvrirlo por konoserlo.
Donde estan eskondidos tus sentidos i verlo
Si siente los dolores de otros, por entenderlo.
Tengo pena por ti de no averte konosido,
Deseo ver tu humanismo i ser konvensido.
Puedes sentir los suspiros de algun maloroso?
La pena del sufrimiento de akel doloryoso?
En su ora difisil puedes darle una mano
Kon sentidos humanos, kon kerensya de ermano?
De tu vida la mas grande erensya ke desharas
Sera solo tu nombre ke en memoryas gravaras.
Haim Vitali Sadacca
Montreal
