eSefarad Noticias del Mundo Sefaradi
Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
De los EXEMPLOS DE LOS RABINOS, arrekojidos de manuskriptos ebreos i livros ebreos raros,
publikados por MOSHE GASTER
Traduizidos al ladino por Matilda Koén-Sarano, Yerushaláim, 2011 de la traduksión al espanyol de Amparo Alba Cecilia, «Las primeras colecciones de cuentos hebreos medievales (traducción y estudio)», Universidad Complutense, Madrid, 1986
EXEMPLO 99
Ambezaron muestros maestros: Avía un ombre ke uzava pratikar la karidad. Una vez fue i se asentó en una barka, en medio del río. Vino el viento i la barka se undió en la mar.
Lo vido Rabí Akiva i fue a testimoniar a su mujer, diziendo ke podia tornar a kazarse. Antes ke yegara el momento, aparesió akel ombre i se metió delantre de eyos.
Le disho Rabí Akiva: «Tú no sos el ombre ke se undió en la mar?»
Le respondió el ombre: «Sí!».
«I ken te kitó de la mar?» demandó Rabí Akiva.
«La karidad ke izi me kitó de la mar».
«I komo saves esto?»
Le respondió el ombre: «Kuando abashí a las profundinas del abizmo, oyí el grande fragor de las ondas de la mar, ke se dizían una a la otra: – Korré, kitemos a este ombre de la mar, porké topimos ke es muy karitativo».
En akel momento se metió Rabí Akiva a eksplikar: «Bindicho sea el Dio de Israel ke deskojó las palavras de la Torá i las palavras de los savios, porké estas palavras kedan para siempre, para la eternidad entera, komo está dicho: Echa tu pan sovre las aguas, ke al kavo de muncho tiempo lo toparás (Ecl. 11,1)». No meldes: «Al kavo de mucho tiempo (Berov ayamim), si no: En medio de mar (Belev ayamim).
Fuente foto rabino: UCL LIBRARY
