Las Notas de Matilda – Kuentos Populares: "LOS EXEMPLOS DE LOS RABINOS" – Exemplo 146

Kada martes, Matilda Koen Sarano mos konta KUENTOS POPULARES..
Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda despues del Notisiario en Ladino .

De los EXEMPLOS DE LOS RABINOS, arrekojidos de manuskriptos ebreos i livros ebreos raros,
publikados por MOSHE GASTER

Traduizidos al ladino por Matilda Koén-Sarano, Yerushaláim, 2011 de la traduksión al espanyol de Amparo Alba Cecilia, «Las primeras colecciones de cuentos hebreos medievales (traducción y estudio)», Universidad Complutense, Madrid, 1986

EXEMPLO 146

Ambezaron muestros maestros: Una mujer fuerte, ke la topará? (Prov. 31, 10). Se trata de la mujer de Rabí Meír.
Kontaron ke una vez Rabí Meír estava asentado darshando durante la minhá de shabat, i murieron sus dos ijos.
Ke izo la madre de eyos? Lo metió en la kama i echó la savanna enriva de eyos.
Kuando eskapó el shabat, tornó Rabí Meír de la kaza de studio i disho a la mujer: «Ande están los ijos?»
Eya le respondió: «Se fueron a la kaza de studio».
Rabí Meír se imediatamente a la kaza de studio, ma no lo topó.
Tornó a kaza i disho a la mujer: «Mirí en la kaza de studio, ma no los vidi».
Eya le disho: «Aséntate, agora vendrán».
El asentó i eya le metió delantre una vazo de vino.
El izo la avdalá i le demandó de muevo: «Ande están mis ijos?»
Eya respondió: «Salieron a pasear. Se irían por akí por ayá. Agora ya van a vinir».
Eya le dio a komer i él disho la berahá. Entonses le disho la mujer: «Sinyor, tengo ke azerte una demanda».
«Azela» respondió el marido.
«Ayer» disho eya, «vino un ombre i me entregó un depózito, i agora vino a tomar lo ke avía depozitado. Devo dárselo atrás o no?»
El le respondió: «Ija mía, a ken depozitó algo en tu kaza, komo no se lo vas a dar atrás?»
Eya le disho: «Sin tu konsintimiento i sin tu konsejo no se lo di».
Ke izo? Lo aferró por la mano, lo izo suvir a la kamareta i lo aserkó a la kama, i él vido a sus ijos echados muertos.
El se metió a yorar i disho: «Ijos míos, ijos ke azían briyar mi kara kon mi konosimiento de la Torá».
En este momento le disho la mujer: «Maestro, no dishites por kavzo: – Da atrás el depózito a su proprietario?»
«El Dio da i el Dio toma, sea bindicho el nombre del Dio (job 1, 21)».

Fuente foto rabino: UCL LIBRARY