Sefer Tora en Djudeo Espanyol – Transkrivida kon letras latinas del livro por Ye’huda Sidi / SHEMOT: 22 VAYAK’HEL (35 a 38)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

22 – VAYAK’HEL

35

¹I adjunto Moshe toda la kompanya de los ijos de Yisrael, i les disho: estas son las kozas ke A’ enkomendo de azer. ²Sesh dias se ara ovra; ma el dia seteno sera santo a vozotros, shabat de olgansa a A’; todo el ke izyere en el ovra, sera matado. ³No ensendash fuego en todas vuestras moradas en el dia del shabat.

⁴I avlo Moshe a toda la kompanya de los ijos de Yisrael, dizyendo: esta es la koza ke A’ enkomendo, dizyendo: ⁵tomad de kon vozotros apartadura para A’; todo veluntaryo de su korason traera la apartadura de A’, oro, i plata, i alambre; ⁶i kardeno, i purpura, i karmezi, i lino fino, i pelo de kavras, ⁷i kueros de barvezes envermejesidos, i kueros de tejones, i maderos de shitim; ⁸i azeyte para la lumbrarya, i espesyas para el azeyte de la untasyon, i para el saumeryo golorozo; ⁹i pyedras de oniks, i pyedras de inchimyentos para el espaldar i para el pechoral. ¹⁰I todo savyo de korason entre vozotros, vendran i aran todo lo ke enkomendo A’: ¹¹el tavernakulo, su tyenda, i su kuvyerta, sus korchetes, i sus tavlas, sus serraderos, sus pilares, i sus almirezes; ¹²el arka, i sus varas, el kuvertero, i el velo de la mamparansa; ¹³la meza i sus varas, i todos sus atuendos, i el pan de las fases; ¹⁴i el almenara de la lumbrarya, i sus atuendos, i sus kandeles, i el azeyte de la lumbrarya; ¹⁵i el ara del saumeryo, i sus varas, i el azeyte de la untasyon, i el saumeryo golorozo, i la mamparansa de la puerta a la entrada del tavernakulo; ¹⁶el ara de la alsasyon, i su resha de alambre, sus varas, i todos sus atuendos, el agua-manil i su asyento; ¹⁷las kortinas de la korte, sus pilares, i sus almirezes, i la mamparansa de la puerta de la korte; ¹⁸las estakas del tavernakulo, i las estakas de la korte, i sus kuerdas; ¹⁹los panyos del servisyo para servir en el lugar santo. Los vestidos santos para A’haron el saserdote, i los vestidos de sus ijos para servir en el saserdosyo.

²⁰I salyeron toda la kompanya de los ijos de Yisrael de delante de Moshe. ²¹I vinyeron, todo varon a kyen su korason levanto, i todo el a kyen su espirito dyo veluntad , i trusheron la apartadura de A’ para la ovra de la tyenda del plazo, i para todo su servisyo, i para los vestidos santos. ²²I vinyeron, los varones kon las mujeres, todo veluntaryo de korason, i trusheron ashorkas, i anyazmes, i aniyos, i kadenados, toda djoya de oro; i todo varon ke emprezento prezente de oro a A’. ²³I todo varon kon kyen se topo kardeno, i purpura, i karmezi, i lino fino, i pelo de kavras, i kueros de barvezes envermejesidos, i kueros de tejones, lo trusho. ²⁴Kualkyera ke apartava apartadura de plata i de alambre, trusho la apartadura de A’; i todo el kon kyen se topo madero de shitim, para toda la ovra del servisyo, lo trusho. ²⁵I todas las mujeres savyas de korason ilavan kon sos manos, i trusheron lo ilado, del kardeno, i de la purpura, i del karmezi, i del lino fino. ²⁶I todas las mujeres ke su korason las levanto en saveduria, ilavan el pelo de kavras. ²⁷I los mayorales trusheron pyedras de oniks, i las pyedras de los inchimyentos para el espaldar i para el pechoral; ²⁸i la espesya, i el azeyte para la lumbrarya, i para el azeyte de la untasyon, i para el saumeryo golorozo. ²⁹Todo varon i mujer a kyen su korason dyo veluntad para traer para toda la ovra ke A’ avia enkomendado de azer por mano de Moshe, trusheron los ijos de Yisrael prezente veluntaryo a A’.

³⁰I disho Moshe a los ijos de Yisrael: mirad, A’ a yamado por nombre a Betsalel, ijo de Uri, ijo de Hur, del trivo de Ye’huda. ³¹I lo inchyo espirito del Dyo, en saveduria, en entendimyento, i en sensya, i en toda ovra; ³²i para inventar inventos, para ovrar en oro, i en plata, i en alambre; ³³i en maestria de pyedras para inchir, i en maestria de madero para ovrar en toda ovra de arte. ³⁴I puzo en su korason para anbezar, el i O’holiav ijo de Ahisamah, del trivo de Dan. ³⁵Los inchyo de saveduria de korason para azer toda ovra de maestro, i de inventador, i de rekamador en kardeno, i en purpura, en karmezi, i en lino fino. I de teshedor, de los ke azen kualkyer ovra, i ke inventan inventos.

36

¹I izo Betsalel i O’holiav, i todo varon savyo de korason, en los kuales A’ dyo saveduria i entendimyento para saver azer toda ovra del servisyo del santuvaryo, segun todo lo ke A’ avia enkomendado. ²I Moshe yamo a Betsalel i a O’holiav, i a todo varon savyo de korason, en el korason del kual A’ avia dado saveduria, a todo el a kyen su korason levanto para ayegarse a la ovra para azerla. ³I tomaron de delante de Moshe toda la apartadura ke los ijos de Yisrael avian traido para la ovra del servisyo del santuvaryo para azerla. I eyos le traian dainda prezente veluntaryo kada manyana. ⁴I vinyeron todos los savyos ke azian toda la ovra del santuvaryo, kada uno de su ovra ke azia. ⁵I avlaron a Moshe, dizyendo: el puevlo trae mucho mas de lo ke es menester para el servisyo de la ovra ke A’ enkomendo de azer. ⁶I enkomendo Moshe, i izyeron pasar pregon por el real, dizyendo: ni varon ni mujer aga mas ovra para la apartadura del santuvaryo. I el puevlo fue vedado de traer. ⁷I la azyenda ke tenian era bastante para azer toda la ovra, i sovrava.

⁸I todos los savyos de korason entre los ke azian la ovra, izyeron el tavernakulo de dyez kortinas, de lino fino torsido, i kardeno, i purpura, i karmezi; kon Keruvim de echura de maestro las izyeron. ⁹La longura de la una kortina era vente i ocho kovdos, i la anchura de la una kortina kuatro kovdos; una medida tenian todas las kortinas. ¹⁰I adjunto las sinko kortinas la una kon la otra, i las otras sinko kortinas adjunto la una kon la otra. ¹¹I izo ojetes de kardeno sovre la oriya de la una kortina del kavo en la adjuntadera; ansi izo en la oriya de la kortina del kavo en la adjuntadera segunda. ¹²Sinkuenta ojetes izo en la una kortina, i sinkuenta ojetes izo en el kavo de la kortina ke estava en la segunda adjuntadera, los ojetes konfrontados el uno kon el otro. ¹³I izo sinkuenta korchetes de oro, i adjunto las kortinas la una kon la otra kon los korchetes, i se izo un tavernakulo.

¹⁴I izo kortinas de pelo de kavras por la tyenda sovre el tavernakulo; onze kortinas las izo. ¹⁵La longura de la una kortina era trenta kovdos, i la anchura de la una kortina kuatro kovdos; una medida tenian las onze kortinas. ¹⁶I adjunto las sinko kortinas aparte, i las sesh kortinas aparte. ¹⁷I izo sinkuenta ojetes sovre la oriya de la kortina del kavo en la adjuntadera, i sinkuenta ojetes izo sovre la oriya de la kortina de la segunda adjuntadera. ¹⁸I izo sinkuenta korchetes de alambre para adjuntar la tyenda, para ke fuese una. ¹⁹I izo una kuvyerta para la tyenda de kueros de barvezes envermejesidos, i una kuvyerta de tejones por ensima.

²⁰I izo las tavlas para el tavernakulo de maderos de shitim, paradas. ²¹Dyez kovdos era la longura de kada tavla, i kovdo i medyo la anchura de kada tavla. ²²Kada tavla tenia dos kisyos enklavijados el uno kon el otro; ansi izo para todas las tavlas del tavernakulo. ²³I izo las tavlas para el tavernakulo, vente tavlas a la parte del sud, al Teman. ²⁴I kuarenta almirezes de plata izo para debasho de las vente tavlas, dos almirezes debasho de la una tavla para sus dos kisyos, i doz almirezes debasho de la otra tavla para sus dos kisyos. ²⁵I para el segundo lado del tavernakulo, a la parte del norte, izo vente tavlas; ²⁶i sus kuarenta almirezes de plata, dos almirezes debasho de la una tavla, i dos almirezes debasho de la otra tavla. ²⁷I para las trazeras del tavernakulo, al oksidente, izo sesh tavlas. ²⁸I dos tavlas para los kantones del tavernakulo en las trazeras. ²⁹I estavan unidas por abasho, i estavan adjuntadas auna a su kavesa a una mizma sortija; ansi izo a ambas eyas en los dos kantones: ³⁰ansi ke eran ocho tavlas, i sus almirezes de plata, dyez i sesh almirezes, dos almirezes debasho de kada tavla. ³¹I izo serraderos de maderos de shitim, sinko para las tavlas del un lado del tavernakulo, ³²i sinko serraderos para las tavlas del otro lado del tavernakulo, i sinko serraderos para las tavlas de las trazeras del tavernakulo, al oksidente. ³³I izo ke el serradero del medyo pasara por medyo de las tavlas de kavo a kavo. ³⁴I kuvryo las tavlas de oro, i izo sus sortijas de oro, por lugares para los serraderos, i kuvryo los serraderos de oro.

³⁵I izo el velo de kardeno, i purpura, i karmezi, i lino fino torsido; de echura de maestro lo izo kon Keruvim. ³⁶I izo para el kuatro pilares de shitim, i los kuvryo de oro; sus ganchos eran de oro; i vazyo para eyos kuatro almirezes de plata. ³⁷I izo una mamparansa para la puerta de la tyenda de kardeno, i purpura, i karmezi, i lino fino torsido, de echura de rekamador; ³⁸i sus sinko pilares, i sus ganchos; i kuvryo sus kaveseras i sus enfashaduras de oro; i sus sinko almirezes eran de alambre.

37

¹I izo Betsalelel el arka de maderos de shitim; dos kovdos i medyo era su longura, i kovdo i medyo su anchura, i kovdo i medyo su altura. ²I la kuvryo de oro fino por adyentro i por afuera, i le izo un serko de oro al derredor. ³I vazyo para eya kuatro sortijas de oro sovre su kuatro rinkones, dos sortijas sovre el un lado de eya, i dos sortijas sovre el otro lado de eya. ⁴I izo varas de maderos de shitim, i las kuvryo de oro. ⁵I metyo las varas en las sortijas sovre los lados del arka, para yevar el arka.

⁶I izo el kuvertero de oro fino; dos kovdos i medyo era su longura, i kovdo i medyo su anchura. ⁷I izo dos Keruvim de oro, batidos los izo, a los dos kavos del kuvertero: ⁸el un keruv del kavo de aki, i el otro keruv del kavo de ayi; del kuvertero izo los Keruvim a sus dos kavos. ⁹I los Keruvim espandian las alas por ensima, kuvryendo kon sus alas sovre el kuvertero, i sus fases la una a la otra; al kuvertero eran las fases de los Keruvim.

¹⁰I izo la meza de maderos de shitim; dos kovdos era su longura, i un kovdo su anchura, i kovdo i medyo su altura. ¹¹I la kuvryo de oro fino, i le izo un serko de oro al derredor. ¹²I le izo una serradura de anchura de un punyo al derredor; i izo un serko de oro a su serradura al derredor. ¹³I vazyo para eya kuatro sortijas de oro, i puzo las sortijas sovre los kuatro rinkones ke estavan a sus kuatro pyes. ¹⁴En frente de la serradura estavan las sortijas por lugares para las varas para yevar la meza. ¹⁵I izo las varas de maderos de shitim, para yevar la meza, i las kuvryo de oro. ¹⁶I izo los atuendos ke avian de estar sovre la meza, sus platos, i sus kucharones i sus templaderas, i las kupas kon ke se avia de templar, de oro fino.

¹⁷I izo la almenara de oro fino; batida izo la almenara; su tronko, i sus brasos, sus vazos, sus mansanas, i sus flores eran de si mizma. ¹⁸I sesh brasos salian de sus lados, tres brasos de la almenara del un lado suyo, i tres brasos de la almenara de su otro lado. ¹⁹Tres vazos almendrados avia en el un braso, kon mansana i flor, i tres vazos almendrados en el otro braso kon mansana i flor; ansi en los sesh brasos salyentes de la almenara. ²⁰I en la almenara mizma avia kuatro vazos almendrados, sus mansanas, i sus flores. ²¹I una mansana debasho de los dos brasos, de si mizma, i una mansana debasho de los otros dos brasos, de si mizma, i una mansana debasho de los otros dos brasos, de si mizma, por los sesh barasos salyentes de eya. ²²Sus mansanas i sus brasos eran de si mizma, toda eya batida de un pedaso de oro fino. ²³I izo sus syete kandeles, i sus tenazas, i sus paletas, de oro fino. ²⁴De un kintal de oro fino la izo, kon todos sus atuendos.

²⁵I izo el ara del saumeryo de maderos de shitim; un kovdo era su longura, i un kovdo su anchura; kuadrada era; i dos kovdos era su altura; sus kuernos eran de si mizma. ²⁶I la kuvryo de oro fino, su tejado, i sus paredes al derredor, i sus kuernos; i le izo un serko de oro al derredor. ²⁷I le izo dos sortijas de oro debasho de su serko, sovre sus dos kostados, sovre sus dos lados, por lugares para las varas kon ke avia de ser yevada. ²⁸I izo las varas de maderos de shitim, i las kuvryo de oro.

²⁹I izo el azeyte de la santa untasyon, i el saumeryo limpyo de espesyas, de echura de konfesyonador,

38

¹I izo el ara de la alsasyon de maderos de shitim; sinko kovdos era su longura, i sinko kovdos su anchura; kuadrada era; i tres kovdos era su altura. ²I izo sus kuernos sovre sus kuatro kantones; sus kuernos eran de si mizma; i la kuvryo de alambre. ³I izo todos los atuendos del ara, las oyas, i las paletas, i las esparzideras, los pirones, i los brazeros; todos sus atuendos izo de alambre. ⁴I izo para el ara una resha de alambre de echura de red, debasho de su redondez por abasho asta su medyo. ⁵I vazyo kuatro sortijas para los kuatro kavos de la resha de alamabre, por lugares para las varas. ⁶I izo las varas de maderos de shitim, i las kuvryo de alambre. ⁷I metyo las varas en las sortijas sovre los lados del ara, para yevarla kon eyas; guekas de tavlas la izo.

⁸I izo el agua-manil de alambre, i su asyento de alambre, de los espejos de las mujeres ke se adjuntavan en kompanyas a la puerta de la tyenda del plazo.

⁹I izo la korte; a la parte del sud, al Teman, avia syen kovdos de kortinas, a lo largo de la korte, de lino fino torsido: ¹⁰sus pilares vente, i sus almirezes vente de alambre; los ganchos de los pilares i sus enfashaduras, de plata. ¹¹I a la parte del norte avia syen kovdos de kortinas, sus pilares vente, i sus almirezes vente de alambre; los ganchos de los pilares i sus enfashaduras, de plata. ¹²I a la parte del oksidente avia sinkuenta kovdos de kortinas, sus pilares dyez, i sus almirezes dyez; los ganchos de los pilares, i sus enfashaduras, de plata. ¹³I a la parte del Levante, al oryente, avia sinkuenta kovdos de kortinas: ¹⁴kinze kovdos de kortinas al un lado, sus pilares tres, i sus almirezes tres: ¹⁵i al otro lado, de la una parte i de la otra de la puerta de la korte, kinze kovdos de kortinas , sus pilares tres, i sus almirezes tres. ¹⁶Todas las kortinas de la korte al derredor eran de lino fino torsido. ¹⁷I los almirezes para los pilares eran de alambre; los ganchos de los pilares i sus enfashaduras, de plata; i la kuvyerta de sus kaveseras, de plata; i todos los pilares de la korte eran enfashados de plata. ¹⁸I la mamparansa de la puerta de la korte era de echura de rekamador, de kardeno, i purpura, i karmezi, i lino fino torsido; i vente kovdos era la longura, i la altura en la anchura sinko kovdos, konforme a las kortinas de la korte: ¹⁹i sus pilares kuatro, i sus almirezes kuatro de alambre; sus ganchos, de plata; i la kuvyerta de sus kaveseras, i sus enfashaduras, de plata. ²⁰I todas las estakas del tavernakulo i de la korte al derredor eran de alambre.

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.