eSefarad Noticias del Mundo Sefaradi
Su Fondasion i su Desvelopamiento
Komo lo eskrivyo el sinyor Moshe Ha-Elion
La Idea I Su Realizasion
Empesando d’en medio de la dekada de los anyos vente i fina el 1939, uvo una emigrasiom importante de los Djidios de Saloniki a la Fransia, los Estados Unidos i tambien a la Tierra de Israel (estonses Palestina).
En los anyos 1928-1935 imigraron a Palestina muchas sientenas de los Djidios de Saloniki, entre eyos un gran numero apartenyendo a las klasa rikas de la sivdad i unos kuantos de los shefes de la Komunidad.
Eyos se instalaron primeramente a Tel-Aviv.
En emigrando a Palestina se salvaron estos orijinarios de Saloniki de la mala suerte ke tuvieron los ke se kedaron ayi, serka de 55,000 ombres, mujeres, viejos i kriaturas.
Estos, i entre eyos miembros de famiya i serkanos de los ke venyeron a Palestina, fueron transferados por los Almanes en los mezes Marso i Augusto 1943, dos anyos despues ke konkuistaron la sivdad, a los kampos de eksterminasion Auschwitz-Birkenau, i ayi la mas grande parte de eyos fueron asasinados en la kamaras de gazes.
De los serka 2,000 reskapados, la metad imigraron a Israel despues de la Shoa.
Los ke venyeron de Saloniki, ke se integraron bastante presto en todos los sektores de la ekonomia de Palestina, kontinuaron la ermoza tradision de aktividad publika para el interes publiko, ke tenia lugar a la sivdad de sus orijin, i fondaron institusiones relijiozasas, kulturalas, de asistensia, i de ayudo mutual para el benefisio jeneral.
Una de la institusiones, ke fue fondada al 1933 por personas aktivas ke avian venido de Saloniki, fue el klub «Kadima», ke de su parte fondo diversas asosiasiones i ovro mucho para la integrasion de los imigrantes, no solo de Saloniki i de la Grecha, si no ke de los otros estados del Balkan tambien.
Al 1940, al empesijo de la Segunda Gerra Mondiala, se serraron los portos de Palestina, inkluzo el porto de Tel-Aviv, ke la mayoridad de sus lavoradores avian venido de Saloniki, i eyos kedaron sin echo.
Afin de ayudar a los ke kedaron sin echo, dechidiron los shefes de «Kadima» de fondar un restorante popular, komo la institusion «Matanot La-Evionim» (Regalos Para Los Proves), ke existia a Saloniki, en el kual iyan a pueder komer los ke estavan batal i los miembros de sus famiyas de baldes o kon paga chika.
Se fondo la asosiasion «Mitbah Zol La-Nitsrahim»
(Kuzina Barata Para Los Menesterozos).
Esta kuzina estava situada fina la fin del 1946 a la kanton de las kayes Chlenov-Levinsky a Tel-Aviv, i despues se paso al Bet Shaltiel a la kaye Levinski 86.
Esta asosiasion se enrezio en pasando los anyos i sus miembros se metieron por buto de alargar sus kampo de aktividad i de fondar i de desvelopar kazas de avrigo para chikos, djovenos i viejos.
Los Fondadores
Al 18/7/1952 se afirmo un kontrato entre la Asosiasion
«Mitbah Zol La-Nitsrahim», de una parte, i los miembros de la famiyas Recanati i Caraso, de la otra.
La Asosiasion se engajo de fraguar una «Kaza De Avrigo Para Viejos»
a Kiriat Matalon, a Petah Tikva, ke va a kontener a parte de kazas de morada, tambien un Kal, una Klinika i mas, i de dirijirla despues ke iya a ser konstruizida.
La famiya Caraso tomo la ovligasion de meter a la dispozision de la «Kuzina»
10 terrenos en Kiriat Matalon, i la famiya Recanati un dono de 22,500 liras Israelianas.
De mas fue achetado ke la institusion ke se va a fraguar va a tomar el nombre del defonto Leon Recanati ,afin de perpetuar su nombre i por sinyo de rekonosensia a la ovra de vida de esta persona muy aktiva, ke tambien ofisio, antes ke emigro de Saloniki, komo prezidente de esta Komunidad.
Leon Yeuda Recanati nasio a Saloniki al 25 Kislev 5650 (18/12/1889) komo ijo de Shemuel, de una novle famiya de Rabinos, desendiente del bien konosido Posek R. Menahem Recanati (sientena 13).
Se okupava de ensenyamiento i de komercho.
Se izo miembro de «BENE BERIT», i desde el 1928 ofisio komo Prezidente de la lodja a Saloniki.
Era el delegado de los Djidios de Grecha al Konsilio de la Adjensia Djudia.
Partisipo a la Direksion de la Komunidad Djudia de Grecha i fue su Prezidente fina ke imigro a la Tierra de Yisrael.
Partisipo komo delegado de lo Djidios de Grecha a los primeros Kongresos Zionistas i tambien despues de su emigrasion de Saloniki fue elejido delegado de los Djidios de Grecha al Kongreso Djidio Mondial al 1936.
Gidado por la Vizion Nasionala imigro kon su famiya a la Tierra de Israel al 1935 i se instalo a Tel-Aviv.
Aki fondo i metio los fondamentos firmos de LA BANK ERETS YISRAEL LEDISCONT BAAM, ke kon el tiempo su nombre se troko en BANK DISCONT LE-YISRAEL.
Grasias a sus buenos atadijos komersiales i a su personalidad, el reusho a mobilizar grandes kapitales de Djidios de Ejipto i otros paezes para el desvelopamiento de la vida ekonomika de la populasion.
Sus echas isu ovra enkorajaron i enreziaron la inisiativa individuala, i kontribueron mucho a la formasion del desvelopamiento de la populasion Djudia en Yisrael.
En Yisrael tomo parte aktiva en una larga seria de aktividades publikas i nasionalas komo miembro de la KEREN AYESOD, miembro de la direksion de la AGUDAT SHOHARE ‘HA-UNIVERSITA ‘HA-IVRIT, prezidente del klub KADIMA, prezidente del konsilio de la EDA ‘HA-SEFARADIT BE TEL-AVIV, fondator i prezidente de la sosieta BANIM LIGVULAM ke tenia por buto la kolonizasion de Djidios Sefaradis komo agrikultores, miembro aktivo de la lodja BNE BERIT, prezidente de la direksion de la KEREN LETALMIDIM ke la fondo para ayudar a elevos talentozos menesterozos.
Su aktividade larga i devuada en Israel por el benefisio de la populasion i la komunidad, fue el simbolo de la novleza djudia enraigada, ke se konservo i se desvelopo a Saloniki, kontinuando la epoka de briyo de los Djidios de Espanya.
Murio a Tel Avil al 6 Heshvan 5706 (13/10/1945).
Segun la dechizion de la Asamblea Jenerala del «Mitbah Zol La-Nitsrahim», fue fondada al 24/11/1955 una asosiasion separada kon el nombre «Bet Avot Leon Recanati».
La fonksion de la mueva asosiasion se fikso: de arresevir del «Mitbah Zol» los bienes de la kaza en fraguida, de kontinuar a fraguarla, de entretenerla, de dirijirla i de arresevir viejas i viejos.
Los fondadores de la asosiasion mueva fueron: «Mitbah Zol La-Nitsrahim»,
i los defontos Moshe Caraso, Daniel Recanati, Shelomo Venezia, Yitshak Saporta, David Pilosof i Avraam Beraha.
La Avridura del «Bet Avot»
La fraguida del «Bet Avot» se termino al 1956, i empeso a fonsionar antes de
Rosh Ashana i kontenia solo dos edifisios. Mas tadre se fraguo otro un edifisio en el kual instalaron los departamentos de viegos aflakados i hazinos.
El «Bet Avot» Agora
El «Bet Avot» se alargo kon el tiempo.
Se fraguaron mas edifisios i mas departamentos i se alargaron los servisios ke se dan a los moradores, sea al kampo de la medikeria i sea al kampo de la komodidad i de la kultura.
Oy moran en muestra kaza 199 personas en 163 kamaretas, en 7 edifisios i kazitikas.
D’entre eyos de Turkia 77 (39%), de Grecha 75 (38%), de Bulgaria 16 (8%),
de otros paezes 31 (16%).
Estos numeros amostran ke todos sus moradores eran – i son oy tambien – orijinarios de los paezes del Balkan, ke lo ke tienen de komun es ke avlan el Ladino, la lingua de los Djidios ke se instalaron en los paezes del Imperio Otomano despues ke fueron ekspulsados de Espanya al 1492′ i aunke los ke lo avlan se empokesieron, kontinua a existir fina oy.
Existen planos para mas enlargar el «Bet Avot» los anyos proksimos i amejorar los servisios ke se dan a los moradores.
Las Institusiones del «Bet Avot»
Las institusiones del «Bet Avot» ke son kompuestas de voluntarios son:
La Asamblea Jenerala ke tiene 70 miembros, ande las sinyoras Matilda Koen-Serano, Zelda Ovadia i los sinyores Nisim Guvenis, Selim Salti, Momo Ozsinay, Mose Saul son unos de los miembros, el Konsilio kon 21 miembros, ke el sinior Nisim Guvenis es uno de los miembros, i el Komitato Direktor kon 7 miembros.
Yitshak Burla el shefe, Shlomo Karaso, Leon Recanati, Avraham Alkalay, Avraham Markus, Marsel Levi, i Moshe Haelion
Los prezidentes del Komitato Direktor al korso del tiempo:
Lazar Cohen ,Aaron Ruso, Moshe Caraso, David Nahmias i Shelomo Venezia de bendicha memoria, Shelomo Magrizo, i Yitshak Burla ke biven muchos anyos.
Los Direktores Jenerales al korso de los anyos fueron los defontos:
Nisim Cohen i Yosef Almaleh, de bendicha memoria.
