BARBARA STREİSAND por Forti Barokas (teksto i boz)

Barbara nasyo el 24 de Avril en el anyo 1942 en Brooklyn, Nueva York. Malorozamente no konosyo a su padre porke apenas teniya anyo i medyo el padre muryo en una kriza epilepsiya. Se engrandesyo en Brooklyn. La madre Diana, para mantener su famiya lavoro anyos komo direktora de una eskola. Barbara aspero amistad i apoyo de su madre ma nunka no topo la amistad ke dezeava, de sorte teniya una grande distensya kon su propya madre. Syempre le vino a mankar la kerensya de padre. Kuando era chika, viya en sus amigas las relasyones kon los padres, viniya a kaza mirava las fotografiyas de su nasimyento i se emosyonava. La madre nunka avlava del padre, kuando le demandava ke le konte komo era, le dava repuestas sin karinyo i sin sentimyentos.

Barbara izo sus estudyos en el lise Erasmus Hall. Malgrado su madre ke no keriya ke kante, eya se dyo a la muzika. Kanto para todos los ke keriyan oyir su boz i topo solusyon en kantando. No meldo universita, portanto pasava oras i oras en las bibliotekas a meldar livros porke su esfuenyo era Broadway.

En el anyo 1968, en un filmo, partajo el Oskar kon Katherine Hepburn komo la mijor aktris. Barbara tambyen komposo munchas kantikas i tomo premios por estas kompozisyones. Su karyera enpeso en los anyos 1960 en Nueva York, en kantando en syertos klobes.

Barbara en su vida artistika resivyo munchos premios. En un program de televizyon “My Name is Barbra” Emmy i Peabody, en un program de muzik The Concert  resivyo otrun premio Emmy, por su kantika “evergreen” tomo premio Akademiko.

Kon dos konseres mas de 100.000 personas, se retiro de la vida aktiva de la shena i desido a dar konseres solo por favores ma en 2006 torno de muevo a la shena i tomo el titolo de “la mas rika artista djudia”

La reputasyon i los premios, nunka le  dyo satisfaksyon, syempre konsintyo la mankura del padre. Por esta razon, syempre metyo distensya a los ombres i a la amor, porke syempre teniya espanto de abandonarse por sus keridos. Esto se konsentiya difinitivamente en sus kantikas i en el filmo “YENTL” ke fue eskritora, produktora, direktora i djugadera.