eSefarad Noticias del Mundo Sefaradi
Kim Pérez
Un estudyo ensima de la asendensya djudiya de fundadores del Riyo de la Plata komo Geronimo Luis de Cabrera, fundador de Kordova, i Diego Gonzalez de Villarroel, fundador de Tucuman, los dos antepasados miyos.
Son echos konosidos, ma era menester meter orden i bushkar un poko mas de lo ke se konose, ke es lo ke yo ize.
Se ve komo las djenealojiyas antigas de la epoka de la limpyesa de sangre kudyan de tapar obsesivamente kualunke rekodro, mezmo si fue konosido de todos el orijin djudyo del grande Markes de Moya, tiyo nono de Geronimo de Cabrera. Por esto es menester bushkar todos los chikos detayes ke se pueda.
Sakamos una visyon sorprendente de los orijines de la Ardjentina. Tucuman fue yamado Mueva Tyerra de Promisyon, antes de ke eksistyeran las kolonyas anglisas del Norte.
Los Konversos o Benei Anusim , desendyentes de Lope de Madrid, de los Gonzalez Villarroel, de los Torres, ke teniyan varyos antepasados prosesados por la Inkisizyon, izyeron kazamyentos entre eyos, lo mezmo ke en la Peninsula, afin segun penso de adjuntarsen i guadrar bivos sus rekodros, i fueron el sentro de la mueva sochetá, asperando una mueva
vida en akeyas tyerras ermozas.
Syerto ke uvo gerras kon los Indyos. No todo es ermozo. Ma la esperanza era syerta. Algun diya todo sera komo kale ke seya! Esto es el korason del Judezmo!
Se puede meldar mas sovre este buto en Yo Sefardí, una pajina dedikada a la Djenealojiya Sefardí.
Kim Perez es Lisensiada en Istoria, retirada komo profesora de Filosofía i Étika en eskola sekundaria.
