eSefarad Noticias del Mundo Sefaradi
Amantes endiamantados de ḥaketía,
Munchas novedades y jbares leva mi alcofa (secta) hoy, y todos endiamantados y de mammasut (substancia).
Vos diré que mi vezina en Israel, la que cuazí no conocía antes, me miró un día coĝendome de mi ferazmal marido, y yo flosha de la meḥná, yendo davagar pa el dutor (medico). Vino ella y se quedó de tras mía que me entre a su cazza pa un vazzito de té desferenciado y wuenezito, que será meĵor de las melezinas de los dutores que matan sanos. Y no me soltó ella, ḥattá que dishimos wajjá y mos entrimos a su cazza. Wa no pasó ni un ratito y callaté, callaté; bendicho el Dio y las maravías que pasan en el ˤolam. ¿De onde era su bizabuelo, si no de Tetuán! Rebbí Abraham Rafael Ḥalfón, que deshó a Tetuán y se afincó en Israel en Ḥaifá en 1860. Y con eso, entre mozotras dos, un corasson volvió el espeĵo del otro…
Aquí pongoy tal cual el documento emportante en hebreo por su tío, Ḥaím Ḥalfón, en wuen ˤolam este. Y este documento achocado de detalles emportantes, de cómo era la vida en esos tiempos, de los nombres de los ĵudiós de la kehil.lá de Ḥaifá, sus daca y toma, y de cuando y de onde vinieron, y munchas cozzas más. Cliquear pa leer .
Y pa mi articuló en ḥaketía sobre la historia de la kehil.lá en Marruecos, y entre otras cozzas, la razón que empushó a munchos del ˤolam sefardí, y de Marruecos tamién, a deshar sus cazzas en los años alderredor de ~1860 y ir pa Israel, Cliquear aquí
