“Antolojía de Kuentos Sefaradíes” Kapítolo I: Kuentos de Kulli: 12. TESTIGO A SU FAVOR por Liliana Benveniste

Ver todos los artículos de esta sección

“Antolojía de Kuentos Sefaradíes”
Kuentos traskritos por Liliana Tchukran de Benveniste del livro “Antologia de Cuentos Sefaradíes” de Pascual Pascual Recuero, 1979

———————————————————–

12, TESTIGO A SU FAVOR

Una vez alkilaron los karaim (1) dos personas, un djidyo i un karai, por dozientos tomines (2) a kada uno, i se fueron delantre del Bet Din.

I al empesijo entro el karai i disho su testimonio bien asentado, de modo ke se enganyaron los Bet Din i entendieron ke era verdadero. Ma despues entro el otro testigo, ke era djidyo, i les dio a entender la falsia, diziendo:

– Si no vos keesh de mi, ves ahí los aspros (3) ke me dieron.

Disheron Bet Din:

– I ke bushkavas tu a venir kon el?

Les disho:

– Ya lo senti ke los karaitas estavan bushkando dos personas para ke vinieran a dar testimonio, i dishe entre mi: “- Yo me aré de su vanda i ire kon él, para ke no sea ke topen algun otro ke, por tomar moneda, da el testimonio falso.

Disheron Bet Din:

– Estos aspros sean para ti por rekompensa,ke mozotros tenemos fuersa de empresentartelos a ti, i el karai ke te alkilo yevara su kastigo segun lo merese.

——————————————–

(1) Karaitas

(2) Moneda ke se uzava en Atenas

(3) Moneda ke se uzava en Turkia

——————————————–

Kon referensia talmudika non konkreta, mos da una imajinaria shena en ke se nota la siguridad de la vedra, traida al kavzo de la kapachitá ke deven tener los testigos para asegurar el empesijo de Pesaj (Ex 12-2). Aresentado en el folio 53 c-d  del M. L. Shemot, 8en edision (Izmir 1864)

—————————————–

Kuento trezladado de la notasión fonetika a la notasion AY (Aki Yerushalayim) por Liliana Benveniste del livro “Antología de Cuentos Sefaradíes” de Pascual Pascual Recuero, 1979 – Kapítulo I: Kuentos de Kulli