eSefarad Noticias del Mundo Sefaradi
Ver todos los artículos de esta sección
“Antolojía de Kuentos Sefaradíes”
Kuentos traskritos por Liliana Tchukran de Benveniste del livro “Antologia de Cuentos Sefaradíes” de Pascual Pascual Recuero, 1979
———————————————————–
40. LAS FUSHKITAS* DE LUVYA
Dos haverim ivan por kazales i lo ke ganavan despartian entre los dos. I el uno esa sezudo i no echava los aspros por ayí i los iva avansando; i el otro era gastador i los iva gastando los aspros por ayí en komer i bever ; i se le fueron todos los aspros ke gano i no le kedó pará, i el otro avansó buenos aspros. Estando los dos por kamino en una montanya en un dia de luvya, disho entre sí el ke no le kedo un aspro.
– Oy es el dia de meterlo en basho a mi haver i tomarle toda la moneda ke tiene akojido, siendo no pasan djente por akí ni ay ninguno ke me vea.
I se empesó a konvatir kon su haver, diziendole:
– Por ke tienes tu moneda i yo no?
I se alevantó sovre el, ke era mas forsudo ke su haver, i lo ató pies i manos para degoyarlo. Dishole su haver:
– No me mates, porke el Dió, Bendicho sea, travará mi injurya i te matará. ¿I no meldates ke el ken mata a otros, su fin es de morir matado?
Dishole su haver:
– ¡A, loko! ¿Ke prova ay akí en el tepé de la montanya, para ke den testimonio i me maten?
Dishole su haver:
– Estas fushkitas de luvia ke está aziendo sean por mi testigos delantre del Shem yitbarek, i eyas traven mi injurya, si es ke me matas.
Le izo burka su haver por lo ke disho, i lo mató i le tomo toda la moneda ke tenia enriva, i lo echó entre dos montanyas, i se fue a su kamino. I al treser dia ke lo mató, entro en una sivdad ke no konose ken es el rey ni ken es el pashá. I el rey de akea sivdad kada dia salia teptil i kaminava por la sivdad entera, i el ke amostrava komo ke lo konosia al rey, lo kortava. I dito ombre, el dia ke entro en la sivdad, empeso a aser una luvya godra i se metio devasho de un techado asta ke amajara la luvya; i estando mirando las fushkas de la luvya ke estava aziendo, se akodro de la avla de su haver, ke le disho ke las fushkas de la luvya travaran su injurya i ke diran testimonio, si lo matava. I le salto la riza solo, diziendo » -¿Ke lokura de su haver, ke la luvya tenia de dar testimonio komo lo matava!». I este ke esta riendose solo de sí para sí, i el rey ke se desha pasar teptil i lo ve a este ombre ke esta riendo: Disho el rey:
– Sierto ke este ombre me konosyo ke so el rey i se esta riendo por lo ke pasé teptil.
I le disho a el yelat ke lo kortara. Dishole akel ombre al rey:
– Senyor, ¿por ke me keres matar, i ke es mi kulpa?
Dishole el rey:
– Sierto ke no eres loko de reirte solo, i onde te reites, es sierto ke me konosites i me kijites dar amostrar komo me konosites, I por esto es lo ke te mato.
Dishole el rey:
– Senyor, haber no tengo de esto, i no te konosko, porke yo no so de esta sivdad, i oy entre en la sivdad. I lo ke me rei es por otro kavzo.
Dishole el rey:
– Yo pajas no oygo, i si me dizes la verdad de lo ke te reites, bien; i si no, savete ke te korto, porke no son lokos la djente de reisre solos.
Kuando ya vido este el mal parado, ke ansi komo ansi lo matava, disho: » -Le dire la verdad, i puede ser ke eskape». Dishole:
– Savrás, senyor, ke esto i esto pasa la koza, i la ora ke lo iva a matar, disho ke las fushkas de la luvya fueran testigos i travaran su injurya. I agora vide la luvya i me akodre de lo ke me disho mi haver, i me meti a reir solo, diziendo: » -¿Ke modo de loko ombre, ke la luvya tenia de travar su injurya i da testimonyo komo lo matava?
Entonses disho el rey a los ke yavava a su lado:
– Mira la grandesa del Dió, Bendisho sea, ke paga a kada uno middah ke-néged middah«-medida por medida- , i trusho ke las fushkas de la luvya dieran testigo komo lo mató a su haver.
I le demandó el rey onde era ke morava su haver, i le disho:
– En tal lugar.
I entonses le tomo toda la moneda ke le tomo a su haver i se la envio onde su mujer; i a él lo mató.
————————-
* Burbujas, gotas de lluvia.
—————————————–
Los proverbios espanyoles «ojo por ojo, diente por diente» i «kon el karar ke midieres seras medido», pueden tener su orijen en el pasaje de Abot 2-7, de la kalavera ke flotava en la agua, ke dio manadero al ekzemplo del komentario sefaradí. Trezladado del folio 125 a-b, guadra sierta relasion kon el episodio numero 7 de esta antolodjia. (Vid. asimismo numero 71)
—————————————–
Kuento trezladado de la notasión fonetika a la notasion AY (Aki Yerushalayim) por Liliana Benveniste del livro “Antología de Cuentos Sefaradíes” de Pascual Pascual Recuero, 1979 – Kapítulo II: Kuentos de Magriso.
