eSefarad Noticias del Mundo Sefaradi
Ver todos los artículos de esta sección
“Antolojía de Kuentos Sefaradíes”
Kuentos traskritos por Liliana Tchukran de Benveniste del livro “Antologia de Cuentos Sefaradíes” de Pascual Pascual Recuero, 1979
———————————————————–
43. EL KARNISERO MODESTO
Un talmud haham, bashid i modesto, bushko del Dió ke le dishera ken era su haver en olam abá (el mundo envinien), i izo taniyot i muchiguo kon tefila i suplika, asta ke le disheron una noche en esfuenyos:
– Savras ke el haver tuyo ke demandas ken es el ken tiene de ser olam abá, es tal fulano el karnisero.
I se desperto el dicho talmid haham mal, triste i suspirando por el suenyo ke vido, ke ¿komo el karnisero, ke es un pedrido i amares (inyorante), tenia de ser su haver en olam abá, siendo el tan hasid?
I torno otra vez kon taniyot i tefilot, i le tornaron a dezir en esfuenyos:
– Ya te dishimos ke tal karnisero fulano tiene de ser tu haver en olam abá.
Siendo ke oyo otra vez el dicho talmid haham la avla primera, empezo a yorar yoro grande del sar ke sintyo, i no lo podia tomar a pasensya komo un pedrido, un amares, tenia ke ser su haver en el mundo por avenir. I en lo ke estava triste i yorando, sintio una voz de los sielos, ke le dezian:
– Si no fuera ke eres un buen ombre i hasid, i tenias ovras buenas, meresias muerte por esto ke estas aziendo. ¿I por ke tenias de tomar a fuerte por lo ke te dishe ke tu haver tiene de ser tal karnisero? ¿Ya saves las ovras ke tiene el karnisero fulano echo, ke no ay ombre ke alkanse a azer las ovrs de tal karnisero, i su ovrade akel karnisero en olam abá tiene de ser muy grande?
Komo sintio el talmid haham tales avlas, se alevanto demanyana i se fue a la botika del karnisero i le dio shalom, i se le asento ayi i le disho:
– Kero ke me digas tus ovras i tu hasidutke azes en este mundo.
Le disho a él:
– Savras, senyor, ke yo mi trato es kon muncha derechedad, ke manko no do, i al prove le miro de darle lo mijor de la karne asegun le do al riko; i de lo ke gano, do la metad a la tzedaka i la otra metad me mantengo yo i los de mi kaza.
Le disho el dicho talmid haham:
– Esto ke azes no es tanto de alavar, siendo ke kualkier ombre lo puede azer tambien esto. I esto no me inche lo ke me dizes, sino lo ke kero ke me des a saver es is alguna koza grande tienes echo, ke no lo puede azer kualkier ombre.
Se kedo kayado el karnisero una buena ora, i despues le disho:
– Savra, mi senyor, ke agora me akodre una koza ke ize agora tantos anyos.
Le disho a él:
– ¿Ke es la koza ke izites?
Le disho a él:
– Savras ke un diya, estando en el lavoro, se desho de venir una karavana de goyim, i avian dientro de la karavana munchos kavtivos, i entre medio de eyos una muchachika yorando kon muncha amargura; i me aseke a eya i le dishe: «-Mi ija, ¿de ke yoras kon tanta amargura?». I me disho ami: «-¿Ke te dire, mi senyor? Yo so djudiya i me espanto no sea ke me kiten de mi ley estos goyim; i keria ke me yevaran en lugar de djudiyos para ke me aresgataran de la mano de estos non djudiyos i kedar en djudezmo». I komo senti las palavras de la muchachika, me se kervranto el korason de oyir sus palavras i me apiade de eya, i le dishe: «-Estate kayada, ke yo no te desho en mano de goyim, i yo te arezgateré». I fui onde el amo, i le akompanye muncha moneda para tomarla, mas de lo ke era mi poder, i la arezgate i la yeve a mi kaza. I la muchacha era de edad de doze anyos. I la vesti asta ke se izo mayor. I tenia yo un ijo regalado de edad de vente i un anyo; un dia lo tome a mi ijo i le avle en sekretamente kon muncha buenas, diziendole: «- Ijo mio, kero ke me tomes mi konsejo i agas mi palavra i me kumplas mi veluntad de lo ke te vo a rogar, i tengas bien en este mundo i en el otro mundo». Me respondio mi ijo, diziendo: «-Aki esto, mi senyor, a azer vuestro komando de lo ke komandaresh sovre mi, i no refuzare vuestra palavra». Le dishe a el: «- Ijo mio, lo ke te kero rogar es ke a esta muchacha ke la tomes por mujer, i yo te are vestidos i djoyas de lo ke me demandaras por boka». I me disho mi ijo: » – Aki esto, mi senyor, a azer tu komando».
Entonses me alegre muncho, i le ize todo lo ke me demando de vestidos i djoyas, i le apareje muncho aparejo para la boda, i ordene la boda i konvide a la sivdad entera, i no uvo persona de la sivdad ke no konvide. I tambien konvide a los proves ke avian en la sivdad; i a los proves los asente kon la djente de mi kaza, para ke se averguensaran, i les meti a los proves en su meza de kuantas komidas buenas ke meti a los ombres importantes; i komieron i bevieron, i se alegraron demazyadamente. Pero estuve mirando una meza ke no komian ni bevian, i les dishe a eyos: » – Mis ermanos, ¿ke es el kavzo de esto, ke no vos veo komer ni bever? Kisas alguna mankura vistesh en la komida de algun modo de koza?». Me disheron: » – Mijor ke esta meza no puede aver, ke todo esta djusto i bueno sin ninguna mankura. Pero lo ke mos se kito la gana de komer es ke este prove ke lo asentates kon mozotros, mos kito la gana de komer de verlo yorar i suspirar kon muncha amargura, i de verlo a el mos se kito tambien a mozotros la gana de komer!.
Komo oyi esto, lo tome al prove de la mano i lo kite afuera, i lo yeve en un lugar sekretamente, diziendole: » – Ijo mio, ¿por ke me azes este disgusto en mi fiesta, de yorar i amofinar a todos los konvidados? Dime, ¿ke es el mal ke tienes? Si es alguna devda ke tienes, te la pagare; o si es ke keres alguna moneda enprestada, te enprestare». Me arespondio, diziendo: » – No tengo ninguna devda, ni kero ke me emprestes moneda, sino lo ke esto yorando es ke esta novia ke va a dar kidushim oy tu ijo, ke es de tal sivdd, es mi novia, ke esta despozada kon mi de agora tanto tiempo, i vez ayi el kontrato de kidushim ke tengo komo es ke le di yo kidushim i es mi despozada». I me kito el kontrato i me amostro; i vide komo era verdad lo ke dezia. I le dishe a el: «- Ijo mio, ¿tienes alguna senyal en la muchacha?». I me disho a mi: » – Savras ke una vez la vide en la kaza de su padre ke tenia tal senyal en tal lugar». I vide ke era verdad lo ke dezia; i le dishe a el: «- Ijo mio, tu estate gustozo i no yores, ke yo te kumplire tu dezeo i te dare a tu novya».
Me alevante i yame a mi ijo aparte, i le dishe: » – Ijo mio, ya me izites mi veluntad de lo ke te dishe ke tomaras a esta muchacha por novya; i agora kero ke me agas otra veluntad ke te vo a demandar, i no kero ke me refuzes en lo ke te vo dizir». Respondio mi ijo i me disho: » – Asegun no te refuze i ize tu komando en lo ke me demandates, lo mezmo agora no te refuzo en lo ke me komandas». Le dishe a el: «. sabras, ijo mio, ke esta novya ke vas a dar kidushim, ya esta despozada kon otra. I siendo ansi, es vedado agora para ti, ijo mio, i kero ke me agas mi veluntad ke se la des a la muchacha a su marido, ke esta aki, kon todos los vestidos i las djoyas ke le ize; i tu paga sera muy grande de azer esta mitva, i yo te dare otra novia mijor ke esta i te are dos tantos de lo ke te ize agora». I me respondio mi ijo ke ya estava kontente en lo ke azia. I lo pase al prove, i lo vesti i lo pase a la hupá en lugar de mi ijo, i le izieron su sheva berahot; i estuvieron alegres i kontentes todos los ocho dias de la hupá kon el gaste ke gasté para mi ijo. I estuvieron muncho tiepop kon mi, marido i mujer, alegres i kontentes sin ninguan falta de lo ke me demandavan por boka, asta ke kijeron irsen a su sivdad. I kuando ya kijeron irsen a su sivdad, les apareje su provisiones para el viaje de visitdos i komidas, i munchas rekompensas, i los envie en shalom. Esto fue lo ke me akodre ke ize agora tantos anyos.
Komo sintio esto el talmid haham, le disho al dicho karnisero:
– Bendicho el Dió, ke me algrates i me arepozates mi korason de tener un haver komo este en olam abá.
—————————————–
Ke es munchas vezes yerrado lo ke pensimos del proksimo por mor de las apariensias, pensaron los otores djudyos del pasuk de los ijos de Caat (Nm 4-18), komendados por el Dió. Tomaron esto de Meil Tzedaka, este kuento esta inkluso en el folio 12 a-d del komentario de Magriso al livro de los Numeros. Kon chikos trokamientos, fue arekojido despues pr Nissim Moshe Abod, en su komentario del M. L. Kohelet (Konstantinola 1898, pp. 36-39).
—————————————–
Kuento trezladado de la notasión fonetika a la notasion AY (Aki Yerushalayim) por Liliana Benveniste del livro “Antología de Cuentos Sefaradíes” de Pascual Pascual Recuero, 1979 – Kapítulo II: Kuentos de Magriso.
