eSefarad Noticias del Mundo Sefaradi
Ver todos los artículos de esta sección
“Antolojía de Kuentos Sefaradíes”
Kuentos traskritos por Liliana Tchukran de Benveniste del livro “Antologia de Cuentos Sefaradíes” de Pascual Pascual Recuero, 1979
———————————————————–
55. EL SAVIO FEO
La ija de un pashá le disho a Rabi Yehoshua ben Hananya:
– Mira ke hohmáh (1) ermoza en un atuendo tan feo!
Le respondio:
– Mi ija: Tu padre, ¿en ke mete el vino?
Le disho eya:
– En atuendo de baro.
Le disho el Rabi:
– ¡A ija! Toda la djente lo meten en kantaro de baro, i tu padre, ke es rey, ¡ke sea igual ke eyos!
Le disho la ija del pashá:
– ¿I ande lo meterá?
Le disho el haham:
– ¡Ke lo meta en atuendos de plata…!
Fue i selo disho a su padre, i lo echo en atuendos de plata, i se izo el vino vinagre. Le demandó a la ija:
– ¿Ken te ambezó esto?
Le disho eya:
-Rabi Yehoshua ben Hananyá.
Lo yamo al Rabi, i le disho:
– ¿Porke le dishites a mi ija ansí?
Le kontó el misiut, i le disho:
-Me disho ansí, i le arespondi esto.
Le disho el pashá:
-¿I muncha djente ermoza ay entre vozotros, i ay muncha hohmáh en eyos?
Le respondió:
Si eran feos, avia muncha mas hohmáh en eyos, siendo no tenian onde tomarsen orguyo i non se venian a olvidar lo ke meldavan.
(1) Saviduria
—————————————–
El kumplimiento de la Ley en todo su ancho era ovligado para Israel, eskojido por el Dió. De ayi ke insite Yave ante el puevlo para ke no la olvide (Dt 4-9), porke la ermozura umana es pasajera, ma no la sensia. Kon posivle referensia en el tratado Taanit, figura en el folio 85 c del komentario sefaradí dicho en los puntos anteriores.
—————————————–
Kuento trezladado de la notasión fonetika a la notasion AY (Aki Yerushalayim) por Liliana Benveniste del livro “Antología de Cuentos Sefaradíes” de Pascual Pascual Recuero, 1979 – Kapítulo III: Kuentos de Argueti.
