“Antolojía de Kuentos Sefaradíes” de Pascual Pascual Recuero – Kapítolo V – Kuentos de Meir Benveniste: 66. LA KOSECHA trasliteración de Liliana Benveniste

Ver todos los artículos de esta sección

“Antolojía de Kuentos Sefaradíes”
Kuentos traskritos por Liliana Tchukran de Benveniste del livro “Antologia de Cuentos Sefaradíes” de Pascual Pascual Recuero, 1979

———————————————————–

66. LA KOSECHA

Una presona buena estava kaminando por un kamino, i lo topó otra presona i lo vido ke estava pedrido en el kamino. Lo tomó djunto kon él i se lo trusho a su kampo por darle a komer i darle a bever. Vino esta presona buena, i lo empesó aplikar i demandar por sus kavzas i ke son sus echas, ke lo vido ke estava kon aradores en el kampo; i le arespondió ke él tiene munchos aradores en su kampo i ke él está enriva de eyos para aprisarlos en el travajo. Le demandó a él i le disho:

-¿I ké provecho te va a salir de esta aradura?

Le respondió i le disho:

-El provecho ke me sale es ke, kuando lo aro, el kampo lo puedo asembrar.

Le disho a él:

-¿Ké provecho ay a tí en el sembrar?

Le respondió:

-El provecho ke me sale es ke, en asembrando, krese i puedo kortar.

Le demandó:

-¿I ke provecho te sale kon el kortar?

Le disho:

-Lo ke me sale es ke, kuando lo korto, lo puedo traer i lo puedo aventar, i lo puedo echar a el ámbar.

Le demandó:

-¿Ké es el provecho ke tienes en todos estos travajos?

Le respondió:

Los provechos son ke puedo komer i puedo azer moneda kon su vendida.

Le demandó:

-¿I ké provechos tienes en asjuntando la moneda?

Le disho:

-El provecho es ke, en adjuntando la moneda, puedo azer mi veluntad kon todo modo de visios, sea tambien de todo modo de vestido bueno ke yo visto, i so onorado de dientro del puevlo, me ensenyoreo enriva de mis vezinos, me mayorgo enriva de mis enemigos.

Entonses lo kastigó el hasid i le disho:

-Bueno dizen los profetas de los djidyos: «Lo ke aratesh es malisya, lo ke kortatesh es tortura; el fruto ke komitesh es fruto negro» (Os 10-13). Te digo ke tú estas pekando en todas tus echas ke estás aziendo i en todos los partikulares de tus travajos, siendo ke tu idea non está kysta i amada, non kere dicho kuando es aboresida delantre el Kreador. I si era la fin tu idea en adjuntando la moneda por servir a el Dió kon sedaká i matanot a los proves i a los ke meldan en la Ley, entonses te se kontava a ti zahut todos lo spartikulares de los travajos ke nombrates.

—————————————–

En todo kavzo, el lavoro deve tener sempre una fin onesta, dunke sea tan umilde o sufrido komo otra lavor del kampo (Rt 2-4). La leksion afigura en la p. 100 de la ovra nombrada de Meir Benveniste, tomada del titulo ebreo ‘Suf debash’.

—————————————–

Kuento trezladado de la notasión fonetika a la notasion AY (Aki Yerushalayim) por Liliana Benveniste del livro “Antología de Cuentos Sefaradíes” de Pascual Pascual Recuero, 1979 – Kapítulo V: Kuentos de Meir Benveniste.