“Antolojía de Kuentos Sefaradíes” de Pascual Pascual Recuero – Kapítolo V – Kuentos de Meir Benveniste: 68. KOMER SIN AMBRE trasliteración de Liliana Benveniste

Ver todos los artículos de esta sección

“Antolojía de Kuentos Sefaradíes”
Kuentos traskritos por Liliana Tchukran de Benveniste del livro “Antologia de Cuentos Sefaradíes” de Pascual Pascual Recuero, 1979

———————————————————–

68. KOMER SIN AMBRE

Un ombre vido a su haver ke estava muncho mirekiyozo i angustyozo, i le demandó, diziendo:

-¿Por ké estas mirekyozo?

Su haver le respondió:

-Savrás ke el ijo regalado ke tengo lo ave tuvido hazino ay tres dias.

Su amigo le respondió:

-¡Oy lo vide a tu ijo kaminando por la kaye según kamina siempre!

Le respondió su haver a él:

-¿I ké ay si lo vites kaminando por la kaye? A toda via el está hazino, i la muestra es ke todo modo de komida aborese su alma, i non tiene ningun dezeo de ninguna komida ni de ningun apetite.

El amigo, sintiendo esto, de vista fua a la kaza de su haver por vijitar a el manseviko, i le demandó a él, diziendo:

-¿Por ké le azes tomar mirekía a tu padre de non komer ninguna koza?

Le respondió el manseviko, diziendo:

-¿Ké aré, ke mi alma non dezea ninguna koza?

Le disho a él:

-Yo ya supe ke keres ke te de algun poko de moneda, i este modo komes.

I dio i tomó kon el manseviko fin ke lo afalagó de darle a él unas kuantas liras; i tomó el manseviko un pedasiko de karne, fue el amigo ande su haver, alegre i kontente, diziendo:

-Te daré aviso a ti, mi kerido: Ke tu ijo ya komió esto i esto.

Le disho a él:

-Kontame, mi amigo, ¿ke modo fue el echo ke komió?

I le kontó a él a todo el paso entero. Le disho a él:

-Me maravío de ti, ke esto propio ke me estaas kontando es una senyal ke está hazino de verdad, siendo ke él bushka paga por la komida, ke es tan dulse i savroza, i la tiene por karga fin kantidad ke fue menester a ke le dieras paras por ke komiera.

—————————————–

En kontrario kon las palavras ke disho Boz a Rut: «Ke Yavé te page lo ke izites i aresivas kumplida rekompensa de Yave» (Rt 2-12), mana este kuenteziko, tomado puede ser del Kol Yaakov, del ke se sujiere ke los aktos de djenerosidad no tienen menester de rekompensa. Lo rekojemos del komentario ladino a Rut, pp. 126-127.

—————————————–

Kuento trezladado de la notasión fonetika a la notasion AY (Aki Yerushalayim) por Liliana Benveniste del livro “Antología de Cuentos Sefaradíes” de Pascual Pascual Recuero, 1979 – Kapítulo V: Kuentos de Meir Benveniste.