eSefarad Noticias del Mundo Sefaradi
Ver todos los artículos de esta sección
“Antolojía de Kuentos Sefaradíes”
Kuentos traskritos por Liliana Tchukran de Benveniste del livro “Antologia de Cuentos Sefaradíes” de Pascual Pascual Recuero, 1979
———————————————————–
70. EL RATÓN I LA RANA
Un ratón se asentó en la puerta de el molino. Él estava yeno de arina, i el sol le está dando enriva de él. Empesó a englenearse kon sí apalpando su mostacho, según el uzo de todos los taroner, de su padre i su papú; i en estando ayí, sin ningún espanto i sin ningún miedo, pasa una rana kaminando a su sanidad. La rana, en viendo a el ratón, i le demandó a él si él es el patrón i senyor del molino. el ratón, en su respuesta, le disho:
Mio es el molino, mio es el terekié; ma en verdad es para komer i non para azer trato. el burako ke yo tengo, akeyo es la kaza sekretaria mia; los burakos ke previenen de el molino, akeos son los magazines ke yo incho de trigos. I entre el molino i la piedra a el deredor de eyos yo me echo. I la razón ke me echo en este lugar, es ke todo este lugar está yeno de sémola, i komo i me arto. Esto es mi uzo todo el tiempo. I kuando yo siento alguna patada de ombre, me eskondo en mis grutas, ke los kualos son los burakos, i ke de ayí yo tengo kamino para salir kuando el ombre se va de ayí, ke entonses salgo otra vez para ezmersar sivera.
La rana lo vido a el ratón blanko todos sus miembros, sea sus manos komo el kuelyo. Le demandó a el ratón:
¿Por ké está blanko tu kuero de tu kuerpo? ¿alguna vejés te kayo en tu kuerpo?
Le dishoa eya el ratón:
-¡Non! ¿Ya non te dishe kon la blankura yo moro? Del polvo yo gusto. La polvorina de la arina enmí poza. siempre vo envuelto adientro los sakos del polvo i arina. Esto es la razón ke estó yo blanko, i non es vejés.
Le respondió la rana kon astusia:
-A todavía todas tus vidas son kon espanto i kon miedo. ¿Ké pasto i savor tomas en akea sémola, kuando tus vidas están dekolgadas enfrente, ke de en punto en punto puedes ser matado ke te van bushkando por matarte? I afilu este tiempo ke aves pasado, a todavia tu komer es seko i dur; en tu kuerpo non ay repozo, porke siempre estas yeno de polvorina. Ma lo kual mirame a mí, ke mi kuerpo está limpio i espejado. Ande yo oro, non ay ningun aseladador. Mis komidas son gosozas i savrozas, kontra lo arevés de ti, ke a tu deredor tienes ratoneras por aferarte; i a mi morada es un estado bien akedado. Si mis palavras i mis dichas oyias, todo el menester ke tú tienes ke sea enriva de mí. Ven kon mí en una, i verás a mi morada, i verás lo ke ay en el mundo.El ratón, kon la avla delikada ke la rana le avó, empesó a kaminar kon la rana, sontrayendo a sus ombros i kaminando fin ke vinieron a la oriya del rio. Le dishoa la rana:
-¿Ande es tu kaza ke tú moras?
La rana le respondió:
-De la otra parte del río es. I kuando mi kámara vas a ver, te tiene ke plazer muncho en tus ojos. Ma es menester a ke metas mientes por pasar el rio.
El ratón respondio:
-Según la prensia ke estó viendo, es ke tu morada es en la izla. ¿Kien puede pasar a la otra parte del río? Más mijor a mí por estar en mi kaza a tiempo, ke yo non estó embezado a pasar por mar, i akí en la tierra vo a estar todos dias de mis vidas, ke el kamino por ir a tu kaza es londje i diferente para mí.
La rana, en su respuesta, le disho:
-¡Oygame, mi senyor! Non ay ninguna koza si tu pasas a el río, a razón ke kuando vas a pasar tú por las aguas, yo kon tí vo a estar. Estó bien asegurada ke el río non te aravdonará. Un poko de pena es, ma pensate ke siempre tu vida va a estar asegurada, ningún enemigo vas a tener por aferarte. Si me eskuchas a mí, este ilo ke yo tengo me lo ataré en mi la una punta, i la otra punta te la ataré en tu pie. Yo iré adelantre por mostrarte el kamino, i por seguro es ke ningun mal vas a tener.
El ratón le respondió:
-Según me estás avlando, kaji ke ya vo a meter koraje. Deskovijame mi pacha, i átame.
La rana izo a su komando i se entraron en el rio djuntos, la rana kon el ratón. Kon el adjuntamiento de ilo ke se ataron en sus pies todos dos, eyos vinieron en medio del río. La rana pensó de fundirlo a el ratón i echarloa los avismos. El ratón, viendose en la gran estrecha ke se topó, tomóo un gran koraje i se enfortesió para enadar enriva de las aguas. El ratón peleando kon la rana, i éste kon éste van batiendo enriva las aguas. Enmientres pasó un agila, i los vido a eyos komo estavan atados. Eya disho entre sí:
-Buena arevatadura topé para mí sin penar i sin lazdrar. Por el ilo de eyos están adjuntados, por ayí llos vo aferar i me los vo komer.
Komo an´si fue, ke la agila, komo una kruela, se echó enriva de eyos sin tener ninguna piadad. Tan prezuroza ke estava la agila por komer, vido ke el ratón non estava blanda su karne por puederla komer. Le envarasó el kuero godro i el kaveyo preto, ke en él emoesía. A esta razón voltó sus karas para la rana, viendola tas vistoza i tan buena su karne de komer. Su boka avrió; en una vez se la englutió, i non asegundeó.
El ratón, mirando ke el pie ya se le rompio a poder de munchas fuerzas ke él se dió, salió a lo seko i eskapó. Ma la rana, ke pensó por azerle tanto mal al ratón, kayó eya mizma en la red ke eya pensó, i su paga fue tornada en su kaveza.
—————————————–
Las relasiones entre Rut i Noemí, nuera i esfuegra, kontradizen el tema familiar; dunke, komo en esta konseja i de akordo kon el refran sefaradí, «nuera fuites, esfuegra serás, lo ke izites. te arán», Meir benveniste, para su komentario ladino (pp. 194.196) del pasaje de Rut 3 1-8, lo tomó de la koleksión de Mislé Shualím, kon semejanza, ansi mizmo, en la favula de Esopo, kontada despues por La Fontaine.
—————————————–
Kuento trezladado de la notasión fonetika a la notasion AY (Aki Yerushalayim) por Liliana Benveniste del livro “Antología de Cuentos Sefaradíes” de Pascual Pascual Recuero, 1979 – Kapítulo V: Kuentos de Meir Benveniste.
