eSefarad Noticias del Mundo Sefaradi
Ver todos los artículos de esta sección
“Antolojía de Kuentos Sefaradíes”
Kuentos traskritos por Liliana Tchukran de Benveniste del livro “Antologia de Cuentos Sefaradíes” de Pascual Pascual Recuero, 1979
———————————————————–
69. LOS DOS VIAJEROS
Dos mujeres se les fue sus maridos a londje lugar. El uno se fue por razón de su apreto i su provedad, para bushkar a él ofisyo por pueder governar su famiya. El otro era riko muncho, ke non le mankava a él ninguna koza ke su mujer non en plazien a él por razón ke era negra de manyas pasado de la razón, en kantidad ke se kansó de somportar pleitos i mirekías en kada ora i kada punto, fin ke fue menesterozo de desharla sola, i se fue djunto kon este prove a lugar londje en una.
Pasando muncho tiempo, estas mujeres non tenían ningún haber de sus maridos, por razón de la londjura de el kamino ke era muncho; i ivan las mujeres preguntando a todos los merkaderes, los kuales aviadjavan en sivdades londjes puede ser savrán ande están sus maridos. En preguntando, vino un merkader i les dió aviso a todas las dos, kon diziendo:
-Yo vide a vuestros maridos i avlé kon eyos boka kon boka, i me dieron karta para vozotras.
Entonses le rogaron a este merkader muy muncho a ke mirara en su chanta, i ke diera a eyas sus kartas para retornar sus almas. El merkader les respondió i les disho a eyas:
-Agora, mis ijas, andavos a vuestras kazas kon buendad i alegria de korasón, ke por oras estó desbarasado por pueder bushkar; ma viniendo manyana, i vos daré vuestras kartas.
I oyendo estas avlas, la mujer de el riko se alegró muy muncho i se fue a su kaza; ma la mujer de el prove non se meneó de su lugar. empesó a feshigar muncho a ke tomara la kanseria ke bushkara la karta, i ke se la diera devista a eya en akel punto. el merkader le demandó:
-¿Por ké me estás afeshugando este karar mas de la otra, ke ya se fue kontente por el haber bueno ke le dí i se fue a su kaza, i non disho ninguna koza? I tú, ¿por ke tiene ke ser ke te karges sovre mí este karar a non deshar desbarasar mi echo? Ke en tomando un poko de tiempo fin a manyana, ya te la do de vista la karta?
La mujer le respondió kon amargura de su alma, i le disho:
-Savrás ke ay muncha diferensia entre mí a entre mi haverá, por razón ke eya está en su kaza muy senyora, ke todo lo bueno tiene, todo lo muncho i a bueno de riqueza i aver muncho, i su marido non se fue en lugar londje sinon solamente por los pleitos i las merkias ke pasaron entre eyos, i non tiene ninguna merekia en su korason ni ningun prenserio ke puede ser daínda non le amajó la ravia de su marido, ke puede ser ke non va a tornar más nade eya i tiene ke estar atada a vivda en vida. Ma agora ke oyó ke su marido te rogó de tí a ke la konfortes aeya i ke le des a eya la karta ke te dio a tí, non puede venir mas konforte grande ke est; i ya le bastó a eya por lo ke daínda su marido envelunta en eya i ke se espera de tornar. ¿I ke tiene más de meldar la karta? Lo kual ke so yo una mujer ke toda mi vida estuve yevando mal, prova i manka de todo. Mis ojos estan deskolgados i esperando puede ser ke el Dio ya se apiadó de mi marido kon algun ofisio ke toparía, i me enviaría algunas buenas parás por artarlos solamente de pan a mis ijos. ¿I komo ke me konforte agora solamente kon una karta, ke ya supe ke me envió, si dainda non la meldé, i daínda non se si ya alkansó para lo ke él se fue o non? Por esta razón non me puedo sostener por esperar, i mi alma está dezeoza por ver ke está eskrito en la karta.
—————————————–
Kon antesedentes ebreos en Kol Yaakov, komentando el pasuk de Rt 2-18, el otor sefaradí (pp. 147-148 de la ovra dicha) se propoza advertir ke el prove tiene menester de konsuelo.
—————————————–
Kuento trezladado de la notasión fonetika a la notasion AY (Aki Yerushalayim) por Liliana Benveniste del livro “Antología de Cuentos Sefaradíes” de Pascual Pascual Recuero, 1979 – Kapítulo V: Kuentos de Meir Benveniste.
