eSefarad Noticias del Mundo Sefaradi
Ver todos los artículos de esta sección
“Antolojía de Kuentos Sefaradíes”
Kuentos traskritos por Liliana Tchukran de Benveniste del livro “Antologia de Cuentos Sefaradíes” de Pascual Pascual Recuero, 1979
———————————————————–
38. EL TREZER AMIGO
Avia dos amigos, ke la amistad ke tenian el uno kon el otro era una koza maravioza. I akontesió tiempo ke uvo geras entre reynos i se kativaron ditos dos amigos, i kalyeron kada uno en un reynado. I pasando tiempo, vino el uno en la sivdad ke estava su haver, i kuando alkansó a saver el rey komo vino en su sivdad una presona de la sivdad del otro rey, ke era su enemigo, lo djuzgó por espia i enkomendo ke lo mataran. En lo ke lo ivan para matar, se le echo en los pies del rey i le empesó a rogar ke iziera una sedaká kon él. Le demandó el rey, diziendo ke le dishera ké koza era la sedaká ke le demandava. Le disho a él:
– Savrás, mi senyor rey, ke yo so merkader grande en mi sivdad i tengo toda mi azienda despartida entre la djente, i no tengo kontrato sovre eyos; i en matandome tu agora aki, kedan mis ijos i mi mujer en penuria, ke no saven ande esta mi azienda. I por esto, te rogo ke agas esta sedaká kon mi, ke me deshes ir a mi sivdad a arekojer mi azienda i eskrivir kontrato sovre eyas, para ke sepan mi mujer i mis ijos onde esta mi azienda i no se mueran de ambre.
Le disho el rey:
– ¿Ke fiansa tengo en ti ke voltas a venir otra vez aki para ke te mate?
Le disho el dito ombre:
– Mi senyor rey, yo tengo aki un amigo, i esta en tu sivdd, i el sierto ke sale fiansa por mi.
Le disho el rey al dito ombre ke estava en su sivdad:
– Sales tú fiansa por este ombre, ke en no viniendo el akí en tal día ke te mate a ti por en su lugar?
Le disho a el el dito amigo:
– Mi senyor rey, yo salgo fiansa por el, ke en no viniendo en el dia ke dizes, ke me mates a mi por el en su lugar.
I ansi izo el rey, i les metyo un mez de tiempo; i se fue el dito ombre a su sivdad, i a su haver lo metieron en la prizyon asta ke tornara su haver. I disho el rey:
– Kero ver esta maraviya komo se entrega el uno su alma por su haver.
I kuando ya se kumplio el tiempo ke metio el rey i vino el dia del kavo del mez i se izo oras de la tadre, i vido el rey ke no vino akeya presona, enkomendo el rey ke lo kitaran a su haver de la prizyon para matarlo. I en lo ke lo kitavan para matar i le ivan a meter la espada en la garganta, se sintio una voz en la sivdad komo ya vino akel ombre ke esperava el rey. I luego vino delantre el rey i aferó la espada ke le ivan a meter en la garganta a su haver i se la metio en su garganta; i empesaron los dos a travar la espada: El uno la travava para si, i el otro la travava para si. I viendo el rey este modo de milagro, ke mas grande fue lo del kavo ke lo del prinsipyo, se kedaron maraviyados el i su djente de ver tal amistad; i luego enkomendo el rey ke les kitaran la espada de las manos i les emprezentó la muerte, i les dyo el rey muncha azienda, i les disho:
– Vos rogo a vozotros ke, siendo ay tal amistad ente vozotros, ke me tomés a mi tambien por haver trezero entre vozotros.
I izieron ansi.
—————————————–
«Amaras a tu proksimo komo a ti mismo», komando el Dió (Lv 19-18), asta ser konseguente en el karar ke el amigo del kuento. tomando del titolo ebreo Seté Yadot, figura en el folio 83 b-c de la ovra de Magriso. Notar la grande semejansa kon lo okurrido a los pitagorikos Damon i Pitias kon Dionisio, tirano de Siracusa.
—————————————–
Kuento trezladado de la notasión fonetika a la notasion AY (Aki Yerushalayim) por Liliana Benveniste del livro “Antología de Cuentos Sefaradíes” de Pascual Pascual Recuero, 1979 – Kapítulo II: Kuentos de Magriso.
