“Antolojía de Kuentos Sefaradíes” de Pascual Pascual Recuero – Kapítolo II – Kuentos de Magriso: 30. LAS RAZONES DE UN SAVIO por Liliana Benveniste

Ver todos los artículos de esta sección

“Antolojía de Kuentos Sefaradíes”
Kuentos traskritos por Liliana Tchukran de Benveniste del livro “Antologia de Cuentos Sefaradíes” de Pascual Pascual Recuero, 1979

———————————————————–

30. LAS RAZONES DE UN SAVIO

Ivan kaminando por un kamino un haham i sus elevos i toparon en medio del kamino una figura de oro i unos guesos sekos de muerto. Vino uno de los elevos i alevanto la figura de oro, i el haham alevanto los guesos de muerto, i los bezó i los abarasó, i los envolvyo kon un panyo i los enteró. Le disho el elevo a su haham:

– Senyor, ¿por ke deshates el oro de alevantar i alevantates estos guesos de muerto?

Le arespondio el haham i le disho:

– Saveras ke estos guesos pertenesen de onorarlos i guadrarlos porke sé la djoya ke son, ke ya los konosí ke son de un haham ke murio, i ve ayi la fuersa, ke está alado; i siendo así, meresen de katarles kavod, porke estos guesos tienen de tormar otra vez a su grandesa i aresivirse en retorno de los muertos, i ser mas estimados de lo ke eran antes. Pero esta figura de oro no ay en eya ningun onor ni ninguna grandesa, otroke la valutá del oro ke tiene enriva i dientro de él no ay ninguna esensia, sino es una koza muerta, i ansí tiene de kedar muerta para siempre i no tiene ninguna esperansa.

—————————————–

Dunke se kontan komo muertos desde ke el Dió apartó de eyos su kara, los djudyos, en su kudyado relijiozo, se sienten mas meresidos, onorados i rikos ke los otros puevlos, en el respekto por los muertos ke mostra la konseja. Despues de la kurta referensia de la «sigla» g.b:, es difisil rekonoser la ovra hebrea de la ke fue tomada. La enkontrimos al empesijo del komentario de Isaac Magriso al Levítiko, para el Meam Loez (5° Edision, Esmirna 1871, folio 4 c), antes de meterse en el komentario Lv 1-1. Por lo demas, esta moral es la prima de unas dodje ke arekojemos de la mizma ovra.

—————————————–

Kuento trezladado de la notasión fonetika a la notasion AY (Aki Yerushalayim) por Liliana Benveniste del livro “Antología de Cuentos Sefaradíes” de Pascual Pascual Recuero, 1979 – Kapítulo II: Kuentos de Magriso.