“Antolojía de Kuentos Sefaradíes” de Pascual Pascual Recuero – Kapítolo II – Kuentos de Magriso: 28. LOS DOS ERMANOS por Liliana Benveniste

Ver todos los artículos de esta sección

“Antolojía de Kuentos Sefaradíes”
Kuentos traskritos por Liliana Tchukran de Benveniste del livro “Antologia de Cuentos Sefaradíes” de Pascual Pascual Recuero, 1979

———————————————————–

28. LOS DOS ERMANOS

Dos ermanos ke moravan en la sivdad de Ashkelon tenian vezinos goyim, i dezian los vezinos goyim:

– ¡Oy! Manyana se van estos djidios a Yerushalayim a el régel ke uzan a ir tres vezes al anyo, i iremos mozotros i les vaziaremos la kaza.

Estos dos ermanos no tenian konosimiento de esto ke pensavan a azer estos vizinos goyim ke tenian, i se fueron a Yerushalayim i no desharon persona en kaza. Kuandos se fueron, aparesieron, el Dió bendicho sea, dos malahines en semejansa de estos dos ermanos, ke fueran entrando i saliendo en kaza asta ke vinieron dichos ermanos de Yerushalayim. Kuando vinieron, les enviaron prezente a los vezinos goyim ke tenian, pensando ke eyos fueron ke les guadraron la kaza. Les disheron a eyos los goyim:

– ¿Onde estavash vozotros, ke mos enviash agora este prezente?

Les disheron eyos:

– Mozotros estavamos en Yerushalayim, i agoora vinimos.

Le disheron eyos:

– ¿I a ken deshates en kaza?

Disheron:

– No deshamos a dinguno en kaza.

Entonses empesaron los goyim a alavar al Dió bendicho sea i disheron:

– Bendicho sea el Dió de los djudios para siempre, ke tiene largo de eyos i no los deshó nunka ni los desha, i siempre aze kon eyos milagros.

—————————————–

Arekojido del Talmud Yerushalmi (cap. 3° del tratado Petah) i del Yalkut, mos lo trae Isaac Magriso en komentario ladino para el M.L. Shemot (3° parte, 8° edision, Esmirna 1871, folio 85 b.) Tambien lo enkontramos despues, en el M. L. Devarim, de Isaac Arugueti (6° edision, Esmirna 1873, folios 60 d-61 a). En la renovasion de la Ley, A’ komando a Moshe de azer tres peregrinasiones anuales, pometiendole ke «dingunos tomara tu tierra enmientres suvas para emprezentarte a A’, tu Dió» (Ex 34-24); de aki el milagro de la konseja, ke ambeza a kreer i konfiar en las promesas del Dió.

—————————————–

Kuento trezladado de la notasión fonetika a la notasion AY (Aki Yerushalayim) por Liliana Benveniste del livro “Antología de Cuentos Sefaradíes” de Pascual Pascual Recuero, 1979 – Kapítulo II: Kuentos de Magriso.