“Antolojía de Kuentos Sefaradíes” de Pascual Pascual Recuero – Kapítolo I: Kuentos de Kulli: 24. LA BINYA A MEDIAS por Liliana Benveniste

Ver todos los artículos de esta sección

“Antolojía de Kuentos Sefaradíes”
Kuentos traskritos por Liliana Tchukran de Benveniste del livro “Antologia de Cuentos Sefaradíes” de Pascual Pascual Recuero, 1979

———————————————————–

24. LA BINYA A MEDIAS

Un rey plantó una binya i la entregó en poder de un guertelano ke la rija. Kuando vino el tiempo de la vendimya, desho el rey a su esklavo:

– Va, trayeme la uva, i lo ke es de la parte del guertelano deshalo en su poder.

Fue i izo ansí. Despue vino yorando el guertelano i esklamando. Disho el rey:

– Por ke yoras? Pos ke, ¿te tomé alguna koza de tu parte? Lo mio es lo ke tomé.

Le arespondio diziendo:

– Todo tiempo ke erfa yo haver kon ti, estava mi parte bien guadrada, ke ninguno tenia animo de tokarla. Ma agora, ke te kijites espartir i tomates tu parte, kedo mi parte en medio, i la prean los ladrones i matadores, i no se espantan de ninguno.

—————————————–

Tomandolo de Rabbi Yehuda ha-Nasí, Kulli apliko esta konseja en su komentario al kuatren komandamiento (Ex 20-12) – sinken en el teksto i en munchos otros otores -, distingiendo las kualidades ke el ombre aresivio de su padre, de su madre i del Dió. En el punto de su muerte, el Dió toma del ombre los diez dones ke le emprestó, sin importar el uzo ke de eyos izo en vida; solo si lo merese, la amistad kotuneará en el mundo futuro. Se enkontra en el folio 243 a.

—————————————–

Kuento trezladado de la notasión fonetika a la notasion AY (Aki Yerushalayim) por Liliana Benveniste del livro “Antología de Cuentos Sefaradíes” de Pascual Pascual Recuero, 1979 – Kapítulo I: Kuentos de Kulli