Ande se desparesyo el kapidji? por Albert Israel

Se trokaron los estudyos de los architektos en las universitas. Oy los estan ambezando otro modo de desinar apartamentos. Kuando estash desinando el bodrum etaj del apartamento, les estan dizyendo, devesh de meter en la konsiderasyon dos kozas importantes. Ambar grande a kada famiya i luguar de parkear el otomobil. Mas preferable es, si se puede, desinar dos lugares de parkear para kada famiya.

Este modo los estan ambezando…

Akel tyempo las famiyas no teniyan dert de luguar. No aviyan sovramyentos. Mobles vyejos se vendiyan i no se guadravan. Se biviya lo poko por lo muncho i no aviya menester de ambar. Ademas de luguar de parkear otomobiles. Los ke teniyan otomobil eran rikos. Biviyan en kazas grandes. Mozotros moz ivamoz a pie (muncho) u viyajavamoz kon otobuses, trenos i vapores…

Ya la tengo en la oreja la manseves de oy ke me esta demandando: «Si es esto no teniash menester de bodrum etaj?»

Teniamoz, siguro ke teniamoz!!

I akel tyempo aviyan dos kozas importantes en el bodrum etaj:

El kömürlük i la kamareta del kapidji.

Enprimero no aviya kalorifer. El kalorifer vino mas dospues, a las kazas muevas. Aircondition no se saviya lo ke es. Lo ke aviya era soba, grande i buena, de karvon (kok kömürü) u de lenyo. La soba era lokala en el sentro de la kaza para ke kaynte la kaza entera. La chimeneya de la soba aziya un torniko antes ke salga de kaza porke i este buri kayntava bueno. La problema era ande meter el karvon u el lenyo. Por esto teniyamoz abasho, en el bodrum etaj, kömürlük.

Un poko antes de la invyernada viniya el kamyon ke era yeno de karvon/lenyas. Del kamyon abashava un hammal/küfeci. Este küfeci inchiya el sesto grande ke teniya en la espalda de karvon/lenyo i lo transportava al kömürlük. Iva i viniya fin a ke se eskapava todo lo ke aviya en el kamyon. Durada del invyerno este karvon/lenyo se partiya, se suviya ariva i kon esto se kemava la soba.

Ahhh… ke soba… Kayntava de alavar. Afuera puedia ser 10 grados debasho del zero, aryentro era kaynte komo enverano. Enriva de la soba se metiya el librik de kave para azer gute i bever un kaviko. Yo me traseliya kuando mi madre metiya kastanyas, partidas de enmedyo, enriva de la soba. Ke golor… Me kayiyan las bavas solo de verlas ke se estan avriyendo apoko apoko i se estan tostando.

No ay ke dizir ke este kömürlük era muy importante i se utilizava para azer depo el karvon  i las lenyas del sezon entero.

Ama mas importante del kömürlük era la kamareta del kapidji (encargado/portero). Ya se saviya ke apartamento sin kapidji no puede ser. El kapidji era un kazalino ke vino del kazal de anadolu para ganar paras en la sivdad grande. Lo mas de los kazalinos las mandavan a las mujeres i a las kreyaturas a lavorar en los kampos i eyos se asentavan en el kave a djugar tavli. Entre eyos avian los ke preferavan a vinir a la sivdad i ganar paras. A estos les konvenia muncho el ofisyo de ser kapidji. La morada, la agua, el elektrik eran debaldes. I enriva de todo esto, se tomava mezada.

Oy, no se komo izimos este yerro grande i mos ezvacheimos del kapidji. Ke bovedad, ke pyedrita del meoyo!!!

El kapidji era todo en el apartamento. Enprimero de todo era muy onesto. Todos los morantes se konfiavan de el. Era el bekchi de la kaza. El saviya ken entra i ken sale. Ladrones no puedian entrar. Las noches el kapidji serrava la puerta de la entrada. La puerta de la entrada era de fyerro i muy pezgada. Esta puerta se serava kon un gancho largo de fyerro ke era enkolgado en la pared, detras de la puerta. Este gancho se alevantava i se enkashava en el burako espesyal ke aviya en la puerta. Dingunoz no puedian avrir la puerta. La puerta se avriya demanyana deprano, kuando el kapidji se alevantava.

El tomava el syerko de los moradores i los echava al chop de abasho. El los akompanyava a los ijikos chikos de los moradores i los tomava de mano (kargado de los sefertasis de eyos) a la eskola, ke era la eskola djudia de la male. El alimpyava las eskaleras i las ventanas. El trokava los ampules kemados. El se okupava de todos los bozeos ke aviyan en el apartamento i bushkava djente profesyonel kuando el mizmo no saviya komo reparar. Aparte de esto todo el kapidji azia munchos echos kontra un bahshishiko chiko:

• Osman efendi!! terayeme del bakkal 300 gramos de kezo blanko i una damadjana de agua…
• Osman efendi!! Toma este par de kalsados al kunduradji i dizele ke los kuzga sanos…
• Osman efendi!! Oy el teatro se eskapo tadre, avremos la puerta…
• Oman efendi, entro raton a kaza, ven aferralo…
• Osman efendi!! Partemos un poko de lenyos i asuvemolos ariva…

Este modo, Osman efendi era el director djeneral del apartamento. De el se saviya todo. Todo lo ke afitava en el apartamento, todo lo ke afitava en la male i todo el dedikodu de las vizinas. Todo se demandava de el. Las komites de kazas de oy (ועדי בית) tyenen muncho de ambezar de Osman efendi…
Ken es este profesor, kon el kulo puntulo, ke desido de trokar los estudyos de los architektos en las universitas??!!

Albert Israel