eSefarad Noticias del Mundo Sefaradi
Keridos amigos i amigas.
En el Jewish News de esta semana «Jessica Abelsohn» presenta un artikolo ke trata de un momento extraordinario. El aktor ke djugo en Fauda, «Idan Amedi», sorprendio al publiko kuando abraso al Mediko de Kombate ke estava en el mismo ekipo en la armada. El lo salvo de la muerte. Este enkontro extraordinario se paso en «Sultan’s Pool», Amfiteatro de Jerusalem kuando Amedi estava performando en el Festival Annual «Hutzot Ha Yotzer» ke atiro a miles de personas, i ke inkluia a los Reservistos. En medio del akto, Amedi izo un anunsio de manera inesperada. Disho «Oyi ke uno de los medikos ke salvo mi vida esta aki. Ke venga a la eshena i ke se identifike». El alevanto su braso i korrio ayi i le dio un abraso. Despues su amigo fue introdusido al publiko i disho ke se yamava «Tuvia». Amedi estava en medio de una tempesta de amor i afeksion i era konosido por el rolo ke djugo en Fauda.
En Enero 1924 serviendo en «Combat Engineering Corps» en Gaza komo Reservisto, 6 soldados fueron matados i otros eran feridos.
Un insidente de aksidente de la parte de las tropas. Uno de los feridos era Amedi ke avia perdido konsiensia. Dinguno tenia una idea ken era este soldado. En su braseleta estava eskrito «Anonimo, 27 anyos».
El ekipo medikal era krusial. Uno de los doktores examino su pulso i sentio poka harvada. Todo el ekipo salto sovre el para arebivirlo.
El ekipo era kompozado de doktores, paramedikes, kombat medikos i de kombat tropas, lavorando duro para estabilizar al soldado ferido de manera kritika. Le dieron sangre i desblokearon los kaminos de aire i fue solamente despues de 3 helikopteros ke estava bastante estable para ser evakuado. Su respiro fue echo manualmente.
A la fin el proximo dia se supo ken era el. Amedi se rekupero i se torno al show en Jerusalem i todo estava vendido, despues de un anyo ke fue ferido. Disho ke tenia la impresion de aver bivido toda su vida en un anyo. Kuando le demandaron komo paso el anio? Su respuesta fue «Mueres i te dan vidas de muevo». Si tantos soldados fueron salvados en esta gerra, fue grasias a la Armada de Israel ke se ambezo muncho del pasado. Tienen la teknolojia i evakuan presto.
La reunion entre los 2 fue emosional para todos. La istoria rezono a traves Israel. El dover es salvar a los soldados santos. Si kada uno dizia ke otro lo aga, no tendriamos un estado. No tendriamos una armada. Es una mision sagrada. Una gerra ke no empesimos i una guerra ke deve ser terminada. Estamos aki asta ke sera kompletada. Asta ke tornan atras los rehenes. Asta ke Hamas sera eliminada.
Presentado por Simon Geron de Sydney 15/8/2025
Fuente: Ladinokomunita
